پاۆلودار وبلىسىندا قوس ازاماتتىعى بار ايەل ەلدەن شىعارىلدى، دەپ جازادى "ادىرنا" ۇلتتىق پورتالى.
پوليتسيا قىزمەتكەرلەرىنىڭ حابارلاۋىنشا، شارباقتى اۋدانىنىڭ 57 جاستاعى تۇرعىنى ەكىنشى ازاماتتىعىن العانىن جاسىرعان.
"قازاقستان رەسپۋبليكاسىنىڭ ازاماتى 57 جاستاعى ايەل رەسەي فەدەراتسياسىنىڭ ازاماتتىعىن الدى، بىراق قولدانىستاعى زاڭنامادا بەلگىلەنگەن مەرزىمدە شەتەلدىك ازاماتتىعىن العانى تۋرالى حابارلامادى. شەتەل ازاماتشاسىنا قاتىستى قر اقبتك-ءنىڭ 496-بابىنىڭ 2-بولىگى بويىنشا اكىمشىلىك ءىس جاسالىپ، ءىس سوتتا قارالدى. سوت قاۋلىسىمەن ايەلدى ەلدەن شىعارۋ تۋرالى شەشىم قابىلداندى", – دەدى پاۆلودار وبلىسى شارباقتى اۋدانىنىڭ پوليتسيا ءبولىمىنىڭ باستىعى نۇرعالي وماربەكوۆ.
پوليتسيا بيىلعى جىلى وسىنداي بۇزۋشىلىقتار ءۇشىن 158 ازامات اكىمشىلىك جاۋاپكەرشىلىككە تارتىلعانىن اتاپ ءوتتى.
ايتا كەتەيىك، باسقا ەلدىڭ ازاماتتىعىن قابىلداعان كەزدە قازاقستان ازاماتتىعى اۆتوماتتى تۇردە جويىلادى.
"ادىرنا" ۇلتتىق پورتالى
