مادەنيەت جانە سپورت ءمينيسترى داۋرەن اباەۆ باياناۋىلعا بارىپ، تۋريستىك جەرلەرىمەن تانىستى. بۇل تۋرالى ءوزى facebook پاراقشاسىنا پوست جازدى.
“باياناۋىل ۇلتتىق پاركى – تابيعاتى اسەم، توپىراعى تاريحقا تۇنعان تاڭعاجايىپ جەر. كوزدىڭ جاۋىن الارداي ءتورت بىردەي جاۋھار كولى، جاقپارلى تاۋلارى مەن جاسىل جەلەك ورمانى كەز كەلگەن ادامدى وزىنە بىردەن باۋراپ الادى.
البەتتە مۇنداي مەكەندە دۇنيەگە كەلگەن ادامنىڭ وسال بولۋعا ەش حاقىسى جوقتاي. باياناۋىل بەسىگىندە تەربەلگەن عۇلاما عالىمدارىمىز، اۋليەلى تۇلعالارىمىز، اقىن-جازۋشىلارىمىز وسىناۋ تۇمسا تابيعاتتىڭ ەرەكشە كۇشىمەن ەر جەتىپ، ونىڭ اڭىز-ءاپسانالارىن بالا جاسىنان سانالارىنا ءسىڭىرىپ ءوستى.
بۇگىن ءبىز وسى توپىراققا ات باسىن بۇرىپ، وتاندىق ءتۋريزمدى دامىتۋ، ينفراقۇرىلىمدى جەتىلدىرۋ، ساپالى قىزمەت كورسەتۋ ماسەلەلەرى بويىنشا جەرگىلىكتى كاسىپكەرلەرمەن كەزدەستىك.
ءبىر قۋانتارلىعى، بۇل وڭىرگە بيزنەس وكىلدەرى ەرەكشە قىزىعۋشىلىق تانىتىپ، قازاقستاندىقتاردىڭ ايماققا دەمالىپ كەلۋى جىل ساناپ ارتىپ كەلەدى ەكەن.
سونىمەن قاتار ساپار بارىسىندا جەرگىلىكتى تۋريستىك اقپاراتتىق ورتالىقتا بولدىم.
البەتتە، باياناۋىل جەرى – كيەلى ورىندارعا وتە باي. ولاردىڭ ىشىندە قوڭىر اۋليە ۇڭگىرىن ەرەكشە اتاعىم كەلدى. اڭىزداردا قىدىر اتانىڭ مەكەنى دەلىنەتىن قاسيەتتى ۇڭگىر ءالى كۇنگە دەيىن زەرتتەۋشىلەردىڭ نازارىن ەرەكشە اۋدارىپ كەلەدى. بۇگىندە قوڭىر اۋليەگە تىلەك تىلەپ كەلەتىندەر كوپ. ەڭ باستىسى، ول جەردىڭ تازالىعىنا باسا ءمان بەرىپ، ەرەكشە قورعالۋىن قاداعالاۋىمىز قاجەت.
جولشىباي «اۋليە بۇلاققا» سوعىپ، ول جەردىڭ دە ەرەكشە ەنەرگەتيكاسىن بويىمىزعا سىڭىردىك.
جالپى ايتپاعىم، بىزدە قويناۋى قازىنا مەن قۇپياعا تولى، تامسانىپ تاماشالار كورىكتى جەرلەرىمىز وتە كوپ.
الەم تۋريستەرى ارنايى كەلىپ دەمالاتىن وسىنداي جەرلەرىمىزدى ءجيى جارنامالاپ، قىزمەت ساپاسىن جەتىلدىرە بەرۋىمىز كەرەك.
تابيعاتىنا كوز سۋارىپ، تاعىلىمىن بويىمىزعا جيناپ، تۋعان اتامەكەنىمىزدى ارقاشان ارداقتاي بىلەيىك”،- دەپ جازدى ول پاراقشاسىندا.
”ادىرنا” ۇلتتىق پورتالى
