1 قىركۇيەك - ءبىلىم كۇنىنە نەبارى ەكى اپتا ۋاقىت قالدى. ايماقتا بيىل 182 مىڭ وقۋشى ءبىلىم الماق. قىزىلوردا وبلىسىنىڭ اكىمى نۇرلىبەك نالىباەۆ جاڭا وقۋ جىلىندا بالالار ەش كەدەرگىسىز ءبىلىم الۋى قاجەت ەكەنىن العا تارتتى. اسىرەسە، مەكتەپتەردەگى كۇردەلى جوڭدەۋ جۇمىستارىنىڭ ۋاقىتىلى اياقتالۋىن قاتاڭ باقىلاۋعا الدى. بۇگىن ايماق باسشىسى بىرقاتار نىسانداردى ارالاپ، اتقارىلعان جۇمىستاردى كوزبەن كوردى.
بيىل وڭىردەگى 6 مەكتەپتە كۇردەلى جوڭدەۋ جۇمىستارى جۇرۋدە. بۇل ءۇشىن بيۋدجەتتەن 2,1 ملرد.تەڭگە قارجى بولىنگەن. №10 ى.التىنسارين اتىنداعى مەكتەپكە بارعان وبلىس اكىمى ءبىلىم ورداسىنىڭ وقۋ پروتسەسىنە ازىرلىگىن باقىلادى. ايماق باسشىسى جىل سايىن اپاتتى مەكتەپتەردى جويىپ، جاڭا مەكتەپتەردىڭ جەلىسى كوبەيتۋگە باسىمدىق بەرىلەتىنىن ايتتى.
- وقۋشىلاردىڭ قۋانىشىنا ەشتەڭە جەتپەيدى. مەكتەپكە قوماقتى قارجى بولىنگەندىكتەن، كۇردەلى جوندەۋ جۇمىستارى وتە ساپالى ورىندالۋى كەرەك. سەبەبى وقۋ جىلىنا ءبىلىم بەرۋ نىساندارىنىڭ دايىندىعى ۇكىمەت باسشىسىنىڭ تىكەلەي نازارىندا.
دەموگرافيالىق ءوسىمنىڭ ناتيجەسىندە قالادا ىقشام اۋداندار كوبەيىپ، مەكتەپتەردە ورىن تاپشىلىعى ماسەلەسى تۋىنداعانى جاسىرىن ەمەس. بۇل رەتتە اپاتتى جاعدايداعى 4 مەكتەپتىڭ ەكەۋىنىڭ عيماراتىن جاڭا وقۋ جىلىندا تابىستايمىز. توقاباي اۋىلىنداعى ءبىر اپاتتى مەكتەپ جەكە ينۆەستور ەسەبىنەن باستالدى. ال، قازالى اۋدانىنداعى تاعى ءبىر مەكتەپتىڭ جوبالىق-سمەتالىق قۇجاتتارى ازىرلەنۋدە.
سونداي-اق، قالا مەكتەپتەرىندەگى ورىن تاپشىلىعىن جويۋ ءۇشىن 4 مەكتەپتىڭ جانىنان قوسىمشا عيمارات سالۋعا شەشىم قابىلداندى. قازىرگى تاڭدا، 2 مەكتەپتىڭ جوبا-سمەتالىق قۇجاتتارى اياقتالىپ، مەردىگەر كومپانيالار بەكىتىلۋدە. ال، قالعان 2 ءبىلىم ۇياسىنىڭ جوبالىق-سمەتالىق قۇجاتتاماسى ازىرلەنۋدە، - دەدى ن.نالىباەۆ.
ءوڭىر باسشىسى بالالار جىلىنا تارتۋ رەتىندە وڭىردە 80 سپورتتىق ويىن الاڭدارى سالىناتىنىن جەتكىزدى.
سونداي-اق، وبلىس اكىمى ايماقتاعى ءىرى ءوندىرىس ورنى شىنى زاۋىتىنا دا باردى. وتكەن جىلدىڭ جەلتوقسان ايىندا زاۋىتتىڭ كۇيدىرۋ پەشى تەحنيكالىق ىسكە قوسىلعان.
الايدا، پەشتى قوسۋ-رەتتەۋ بارىسىندا اقاۋلار انىقتالىپ، قاجەتتى كۇيدىرۋ قوندىرعىسىنا تاپسىرىس بەرىلىپ، جەتكىزىلدى.
ايماق باسشىسى نۇرلىبەك نالىباەۆتىڭ تاپسىرماسى نەگىزىندە زاۋىتتى ىسكە قوسۋ ءۇشىن بيىلعى جىلدىڭ 25 شىلدەسىندە ارنايى شتاب قۇرىلعانىن جەتكىزدى. مۇنداعى ماقسات - زاۋىتتى ىسكە قوسۋ كەزىندە تۋىنداعان ماسەلەلەردى شۇعىل تۇردە شەشۋ.
اكىمدىك ءوز قۇزىرەتى شەگىندە ينجەنەرلىك ينفراقۇرىلىمدى جەتكىزىپ بەرۋگە جاۋاپتى. وسى رەتتە، زاۋىتقا قاجەتتى ەلەكترەنەرگيا، بايلانىس جەلىسى، اۆتوموبيل جولى، سۋ جانە كارىز جۇيەلەرى جەتكىزىلدى. سىرتقى تەمىر جول تۇيىعى قۇرىلىسى اياقتالدى. ەندى كەزەكتە ەكىنشى تاراپتار تەحنيكالىق جانە اۆتورلىق باقىلاۋ وكىلدەرىنىڭ بەرگەن ەسكەرتۋلەرىن جويۋ جۇمىستارىن جەدەلدەتۋى كەرەك. سەبەبى گاز كەلگەننەن كەيىن، پەشتى قايتا ىسكە قوسىپ، جاعۋ ءۇشىن قابىلداۋ اكتىسىن راسىمدەپ، ءبىتىرۋى قاجەت.
ءوڭىر باسشىسى سالا ماماندارىمەن پىكىرلەسىپ، اۋقىمدى زاۋىتتى ىسكە قوسۋ ءۇشىن قاجەتتى شارالاردى جىلدام قابىلداۋ كەرەك ەكەندىگىن جەتكىزدى.
- شىنىن ايتقاندا، زاۋىتتى ىسكە قوسۋ پروتسەسى تىم ۇزاپ كەتتى. بار مۇمكىندىكتى پايدالانىپ، زاۋىتتى ىسكە قوسۋىمىز قاجەت. بۇعان دەيىن ۋادە كوپ بەرىلگەنىمەن، ناتيجە بولمادى. حالىق اسىعا كۇتىپ وتىر. سوندىقتان قالايدا ءوندىرىستى اياقتاۋعا ءتيىسپىز. اپتاسىنا ەكى رەت شتاب وتكىزىپ، وزەكتى ماسەلەلەردى تالقىلاۋ قاجەت. ءبارى دە مەنىڭ تىكەلەي باقىلاۋىمدا بولادى،-دەدى ن.نالىباەۆ.
ايتا كەتەيىك، جوسپار بويىنشا شىنى زاۋىتىنىڭ ءبىرىنشى ءونىمى قازان ايىندا شىعارىلماق.
