شىمكەنتتە ەكونوميكانىڭ نەگىزگى سالالارىندا دامۋ بايقالدى

3039
Adyrna.kz Telegram

شىمكەنت قالاسىندا بيىلعى جىلدىڭ العاشقى 7 ايىندا ەكونوميكانىڭ بارلىق نەگىزگى سالالارىندا ءوسىم بايقالىپ وتىر. بۇل تۋرالى قازاقستاننىڭ قاڭتار-شىلدە ايلارىنداعى الەۋمەتتىك-ەكونوميكالىق دامۋ قورىتىندىسىن قاراۋعا ارنالعان ۇكىمەت وتىرىسىندا قر پرەمەر-ءمينيسترى ءاليحان سمايىلوۆ مالىمدەدى، دەپ جازادى "ادىرنا" ۇلتتىق پورتالى. 

اتاپ ايتقاندا، قالا ەكونوميكاسىنا تارتىلعان تىكەلەي ينۆەستيتسيانىڭ مولشەرى جىلدان جىلعا ارتىپ كەلەدى. بيىلعى جىلدىڭ العاشقى 7 ايىنىڭ قورتىندىسى بويىنشا شىمكەنت قالاسىنىڭ ەكونوميكاسىنا 219,1 ملرد. تەڭگە ينۆەستيتسيا قۇيىلعان. بۇل كورسەتكىش وتكەن جىلدىڭ وسى مەرزىمىمەن سالىستىرعاندا 28,6 پايىزعا ارتقانىن بايقاۋعا بولادى. ينۆەستيتسيانىڭ باسىم بولىگى جەكە ينۆەستورلاردىڭ قارجىسى ەكەنىن اتاپ وتكەن ءجون. ناقتىراق ايتار بولساق، مەملەكەتتىك بيۋدجەتتەن 52,6 ملرد. تەڭگە، ال، جەكە كوزدەردەن 166,5 ملرد. تەڭگە ينۆەستيتسيا تارتىلىپ وتىر.

رەسمي دەرەكتەرگە سۇيەنەتىن بولساق، ينۆەستيتسيانىڭ ۇلكەن بولىگى نەگىزىنەن 2 سالاعا باعىتتالىپ وتىر ەكەن. ولار – ونەركاسىپ جانە قۇرىلىس سالالارى. سونىڭ ناتيجەسىندە قوس سالادا دا قارقىندى دامۋ بايقالىپ وتىر. ماسەلەن، بيىلعى جىلدىڭ العاشقى 7 ايىندا شىمكەنتتەگى ءوندىرىس ورىندارى 507,5 ملرد. تەڭگەنىڭ ونەركاسىپ ءونىمىن وندىرگەن. ناقتى كولەم يندەكسى 108,4 پايىزدى قۇرادى. ونىڭ ىشىندە، وڭدەۋ ونەركاسىبىندە ناقتى كولەم يندەكسى 109,6 پايىز بولىپ وتىر. ياعني، ءوسىم 9,6 پايىزعا تەڭ.

 

بۇگىندە شىمكەنت قالاسىندا قۇرىلىس جۇمىستارى دا قارقىندى تۇردە ءجۇرىپ جاتىر. ەسەپتى مەرزىمدە بۇل سەكتورداعى اتقارىلعان جۇمىستارىنىڭ كولەمى 76,7 ملرد. تەڭگەگە جەتكەن. وتكەن جىلدىڭ ءتيىستى كەزەڭىمەن سالىستىرعاندا 20,5 پايىزدىق ءوسىم بايقالعان.

جۇمىس ءونىمدى جەردە ونىڭ ناتيجەسى دە جاقسى بولاتىنى بەلگىلى. جىل باسىنان بەرى 7 ايدىڭ ىشىندە شىمكەنتتە 371,8 مىڭ شارشى مەتر تۇرعىن ءۇي پايدالانۋعا بەرىلگەن. بۇل وتكەن جىلعى وسى كەزەڭدەگى كورسەتكىشتەن 15 پايىزعا كوپ.

شىمكەنتتىڭ ءىرى ساۋدا-ەكونوميكالىق ورتالىققا اينالىپ كەلە جاتقانىن جالپى ساۋدا كولەمىنە قاراپ تا اڭعارۋ قيىن ەمەس. قاڭتار-شىلدە ايلارىندا بۇل كورسەتكىش 946,1 ملرد.تەڭگە بولىپ، ناقتى كولەم يندەكسى 109,8 پايىزدى قۇراعان. كولىك جانە لوگيستيكا سالاسىندا 158,5 ملرد. تەڭگەنىڭ قىزمەتى كورسەتىلىپ، ءوسىم 7,2 پايىزدى قۇراسا، ال، بايلانىس قىزمەتىنىڭ جالپى كولەمى 4,8 ملرد. تەڭگەگە جەتكەن. بۇل باعىتتاعى ءوسىم 4,7 پايىزعا تەڭ ەكەن.

 

"ادىرنا" ۇلتتىق پورتالى 

پىكىرلەر