قازاقستاندىق عالىمدار كاپسۋلا تۇردە ۆاكتسينا شىعارۋدى كوزدەپ وتىر. بۇل تۋرالى وكق-دا وتكەن بريفينگ بارىسىندا پروفيلاكتيكالىق مەديتسينا اكادەمياسىنىڭ پرەزيدەنتى، امەريكالىق دەنساۋلىق ساقتاۋ قاۋىمداستىعىنىڭ مۇشەسى الماز شارمان ايتتى، دەپ حابارلايدى “ادىرنا” ۇلتتىق پورتالى.
«كوروناۆيرۋس كوبىنە مۇرىن قۋىسىندا جينالادى. ۆاكتسينانى مۇرىنعا تامىزۋ ارقىلى الۋ وتە ءتيىمدى ءتاسىل. قازىر بۇل باعىتتا قازاقستاندىق عالىمدار دا جۇمىس ىستەپ جاتىر. ۆاكتسينولوگ قايسار تابىنوۆ اگرارلىق ۋنيۆەرسيتەتتە وسى باستامانى قولعا الدى. بۇل ءتاسىل ءالى ىسكە اسىرىلعان جوق، بىراق يزرايل، اۋستراليا جانە اقش-تاعى كوپتەگەن حالىقارالىق توپتار وسى باعىتتا جۇمىس ىستەۋدە. بارلىعى ويداعىداي جۇزەگە اسسا، ۆاكتسينالاۋ پروتسەسى ەداۋىر جەدەلدەيدى جانە ۆاكتسينا قولجەتىمدى بولادى»، - دەدى الماز شارمان.
