ەرلان قياسوۆ قازاقستان رەسپۋبليكاسى دەنساۋلىق ساقتاۋ مينيسترلىگى سانيتاريالىق-ەپيدەميولوگيالىق باقىلاۋ كوميتەتى ۇلتتىق ساراپتاما ورتالىعىنىڭ باسقارما توراعاسى بولىپ تاعايىندالدى. بۇل تۋرالى ۇلتتىق ساراپتاما ورتالىعى حابارلادى، دەپ جازادى "ادىرنا" ۇلتتىق پورتالى.
ەرلان قياسوۆ 1973 جىلى الماتى قالاسىندا دۇنيەگە كەلگەن. قازممۋ، ورتالىق ازيا ۋنيۆەرسيتەتىن، ءال-فارابي اتىنداعى قازۇۋ، «تۇران-استانا» ۋنيۆەرسيتەتىن بىتىرگەن.
ەڭبەك جولىن 1990 جىلى الماتى قالاسىنداعى «جەدەل جاردەم اۋرۋحاناسىنىڭ» جانساقتاۋ بولىمىندە سانيتار بولىپ باستادى.
1997-1999 جج. الماتى قالاسىنداعى قازاقستان رەسپۋبليكاسىنىڭ اۋە كولىگى ورتالىق سانيتاريالىق-ەپيدەميولوگيالىق ستانتسياسىنىڭ سانيتار دارىگەرى، ەپيدەميولوگى بولىپ ەڭبەك ەتتى.
1999 جىلدان 2020 جىلعا دەيىن قازاقستان رەسپۋبليكاسى پرەزيدەنتى ءىس باسقارماسىنىڭ مەديتسينالىق ورتالىعىنىڭ قۇرىلىمىندا – سانيتاريالىق-ەپيدەميولوگيالىق ستانتسياسىنىڭ جالپى گيگيەنا بويىنشا دارىگەرى، جەدەل ءبولىم مەڭگەرۋشىسى، سانيتاريالىق-ەپيدەميولوگيالىق قاداعالاۋ باسقارماسى ەپيدەميولوگيالىق ءبولىمنىڭ مەڭگەرۋشىسى، «سانيتاريالىق-ەپيدەميولوگيالىق ساراپتاما ورتالىعى» رمك ديرەكتورى، قر پرەزيدەنتى ءىس باسقارماسى مەديتسينالىق ورتالىعى مەڭگەرۋشىسىنىڭ ورىنباسارى بولدى.
2020-2022 جج. قازاقستان رەسپۋبليكاسى دەنساۋلىق ساقتاۋ ۆيتسە-ءمينيسترى – قازاقستان رەسپۋبليكاسىنىڭ باس مەملەكەتتىك سانيتاريالىق دارىگەرى قىزمەتىن اتقاردى.
"ادىرنا" ۇلتتىق پورتالى
