تالعار تۇرعىندارى جاڭادان سالىنىپ جاتقان 1200 ورىندىق №25 قالالىق مەكتەپتىڭ ساپاسىنا نارازى بولدى. BI Group سالعان جاڭا عيماراتقا 3 ميلليارد تەڭگە كەتكەن. بۇل تۋرالى جەرگىلىكتى Kris_p_talgar جەلىلىك باسىلىمى مالىمدەدى.
"اكىمدىك بۇل جەرگە ماقتانۋ ءۇشىن اكەلمەگەن ادامى جوق. بىرەگەي، زاماناۋي 1200 ورىندىق مەكتەپ دەپ ايتىپ ەدى. ال قازىر بۇل سارايعا وقۋشىلاردى دا جيناي الماي وتىر. سەگىزىنشى مەكتەپتىڭ باستاۋىش سىنىپ وقۋشىلارىن ءماجبۇرلى تۇردە اۋىستىرۋ ارقىلى تولتىرىپ جاتىر. ال زاڭ بويىنشا قاي مەكتەپكە باراتىنىن اتا-انالاردىڭ ءوزى تاڭداۋعا قۇقىلى", – دەيدى تۇرعىندار.
توبەسىنىڭ جۇقا بولعانى سونشا، ونىڭ ۇستىندە جۇمىسشىلار جۇرگەننەن كەيىن ءبارىن باسىپ تاستاعان.
ىلعالدان توبەسى ءىسىنىپ كەتكەن، قابىرعالاردا جىراقتار بار، سپورت الاڭدارى كىر، ياعني جاۋىن سۋى باسىپ كەتىپ وتىرادى.
"ەڭ باستىسى ءۇش ميلليارد تەڭگەگە سالىنعان مەكتەپتىڭ دارەتحاناسى دالادا. بۇل اقشاعا بىرنەشە مەكتەپتى كەڭەيتىپ، اۋداننىڭ بارلىق مەكتەپتەرىن جوندەۋگە بولاتىن ەدى! تالعار جەمقورلىققا باتىپ كەتتى. اۋدان اكىمدىگىنىڭ جۇمىسى ءساتسىز", – دەپ جازىلدى باسىلىمدا.
الماتى وبلىسى ءباسپاسوز قىزمەتى جاعدايعا قاتىستى Informburo.kz باسىلىمىنا تۇسىنىكتەمە بەرگەن.
"جاڭا مەكتەپ 1200 وقۋشىعا ەسەپتەلگەن. ءار قاباتتا دارەتحانا بار، ءتىپتى بىرنەشەۋ. باستاۋىش سىنىپتار ءۇشىن بالالارعا ارنالعان شاعىن ۋنيتازدارى بار جەكە دارەتحانالار سالىندى", – دەدى الماتى وبلىسى اكىمىنىڭ ءباسپاسوز قىزمەتىنىڭ جەتەكشىسى عالىمۇرات جۇكەل.
ونىڭ ايتۋىنشا، جاقىنداپ كەلە جاتقان وقۋ جىلىنا قاراي جانە قازاقستان پرەزيدەنتىنىڭ تاپسىرماسى بويىنشا الماتى وبلىسىنداعى جاڭا جانە ەسكى مەكتەپتەردىڭ بارلىعىنا اجەتحانالار ورناتىلدى. كوشەدە سپورتپەن شۇعىلداناتىن مەكتەپ وقۋشىلارى ءۇشىن سىرتتاعى دارەتحانا وتە ىڭعايلى. سونداي-اق، اۋدان ورتالىعىنداعى سۋدى اپاتتى جاعدايدا توقتاتقاندا سىرتتاعى دارەتحانا دا پايدالى بولۋى مۇمكىن.
”ادىرنا” ۇلتتىق پورتالى
