Talǵar turǵyndary jańadan salynyp jatqan 1200 oryndyq №25 qalalyq mekteptiń sapasyna narazy boldy. BI Group salǵan jańa ǵımaratqa 3 mıllıard teńge ketken. Bul týraly jergilikti Kris_p_talgar jelilik basylymy málimdedi.
"Ákimdik bul jerge maqtaný úshin ákelmegen adamy joq. Biregeı, zamanaýı 1200 oryndyq mektep dep aıtyp edi. Al qazir bul saraıǵa oqýshylardy da jınaı almaı otyr. Segizinshi mekteptiń bastaýysh synyp oqýshylaryn májbúrli túrde aýystyrý arqyly toltyryp jatyr. Al zań boıynsha qaı mektepke baratynyn ata-analardyń ózi tańdaýǵa quqyly", – deıdi turǵyndar.
Tóbesiniń juqa bolǵany sonsha, onyń ústinde jumysshylar júrgennen keıin bárin basyp tastaǵan.
Ylǵaldan tóbesi isinip ketken, qabyrǵalarda jyraqtar bar, sport alańdary kir, ıaǵnı jaýyn sýy basyp ketip otyrady.
"Eń bastysy úsh mıllıard teńgege salynǵan mekteptiń dárethanasy dalada. Bul aqshaǵa birneshe mektepti keńeıtip, aýdannyń barlyq mektepterin jóndeýge bolatyn edi! Talǵar jemqorlyqqa batyp ketti. Aýdan ákimdiginiń jumysy sátsiz", – dep jazyldy basylymda.
Almaty oblysy baspasóz qyzmeti jaǵdaıǵa qatysty Informburo.kz basylymyna túsinikteme bergen.
"Jańa mektep 1200 oqýshyǵa eseptelgen. Ár qabatta dárethana bar, tipti birnesheý. Bastaýysh synyptar úshin balalarǵa arnalǵan shaǵyn ýnıtazdary bar jeke dárethanalar salyndy", – dedi Almaty oblysy ákiminiń baspasóz qyzmetiniń jetekshisi Ǵalymurat Júkel.
Onyń aıtýynsha, jaqyndap kele jatqan oqý jylyna qaraı jáne Qazaqstan prezıdentiniń tapsyrmasy boıynsha Almaty oblysyndaǵy jańa jáne eski mektepterdiń barlyǵyna ájethanalar ornatyldy. Kóshede sportpen shuǵyldanatyn mektep oqýshylary úshin syrttaǵy dárethana óte yńǵaıly. Sondaı-aq, aýdan ortalyǵyndaǵy sýdy apatty jaǵdaıda toqtatqanda syrttaǵy dárethana da paıdaly bolýy múmkin.
”Adyrna” ulttyq portaly
