QR Premer-ministrı Älihan Smaiylov ekonomikany demonopolizasiialau jönındegı komissiianyŋ kezektı otyrysyn ötkızdı, onda qant naryǧyndaǧy monopoliiaǧa qarsy den qoiu şaralary qaraldy. Būl turaly Ükımet basşysynyŋ baspasöz qyzmetı mälımdedı, dep habarlaidy “Adyrna” ūlttyq portaly.
Bäsekelestıktı qorǧau jäne damytu agenttıgınıŋ töraǧasy Serık Jūmanǧarin elımızde qanttyŋ negızgı kölemı Jambyl jäne Almaty oblystarynda ornalasqan tört zauytta öndırıletının atap öttı.
«Būl rette elde öndırılgen qanttyŋ negızgı kölemın (şamamen 90%) ırı köterme jetkızuşınıŋ satyp alǧany atap ötıldı, onyŋ ıs-äreketterınen tauardy ainalymnan alyp qoiu belgılerı baiqalyp otyr, sonyŋ saldarynan qanttyŋ naryqtyq baǧasy 700-800 teŋgege deiın köterılgen, al öndıruşı zauyt ony 420-450 teŋgeden satady», - delıngen habarlamada.
Qant satudyŋ dinamikasyn zertteu barysynda är aidyŋ soŋynda kompaniiada eldıŋ jekelegen öŋırlerınde sūranysty ışınara qanaǧattandyruǧa mümkındık beretın qaldyq qordyŋ bolǧany anyqtaldy. Osyǧan bailanysty Bäsekelestıktı qorǧau jäne damytu agenttıgı monopoliiaǧa qarsy zaŋnamany būzu belgılerı boiynşa tergeu taǧaiyndady.
«Qalyptasqan jaǧdaidy özgertu üşın naryq subektılerınıŋ tauar birjasy arqyly qanttyŋ eŋ az partiialaryn (60 tonna) ötkızu bölıgınde olarǧa baqylaudy qataŋdatu, sondai-aq importtauşylardy birja arqyly qant ötkızudı jüzege asyruǧa mındetteu jäne öndıruşı zauyttar üşın şikızat satyp aluǧa ainalym nesielerın bölu mäselesın qarau ūsynyldy», - delıngen habarlamada.
Premer-Ministr ūsynylǧan täsılderdı qoldap, memlekettık organdarǧa bırqatar qosymşa tapsyrmalar berdı.
Ükımet basşysy Bäsekelestıktı qorǧau jäne damytu agenttıgıne monopoliiaǧa qarsy zaŋnamany būzu belgılerı boiynşa kompaniiaǧa qatysty tergeudı jalǧastyrudy tapsyrdy.
Qarjylyq monitoring agenttıgıne osy käsıporynnyŋ qyzmetın yqtimal būzuşylyqtar tūrǧysynan egjei-tegjeilı taldau tapsyryldy.
Sonymen qatar Premer-ministr Sauda jäne integrasiia ministrlıgıne Auyl şaruaşylyǧy ministrlıgımen jäne öŋırlerdıŋ äkımdıkterımen bırlesıp, otandyq qant zauyttaryna şikızat satyp aluǧa «ainalym shemasy» boiynşa qarajattyŋ bır bölıgın jıberu mäselesın pysyqtaudy tapsyrdy.
”Adyrna” ūlttyq portaly
