ءۇشىنشى مەگاپوليس ماڭىنداعى «بالداۋرەن» دەمالىس ايماعىندا جاس اقىندار اراسىنداعى رەسپۋبليكالىق «كۇمىس دومبىرا» ايتىسى مارەسىنە جەتتى. جىر دوداسى بيىل قازاقتىڭ ۇلى اعارتۋشىسى اباي كۇنىنە ورايلاستىرىلعان. ونەر سايىسىن شىمكەنت قالاسى اكىمىنىڭ ءبىرىنشى ورىنباسارى شىڭعىس مۇقان باستاعان كورەرمەندەر تاماشالادى.
– جازبا جانە ايتىسكەر اقىندار اراسىنداعى «كۇمىس قالام» جانە «كۇمىس دومبىرا» بايقاۋلارى بيىل ەكىنشى رەت وتۋدە. بىلتىر شىمكەنت قالاسىندا وتكەن جىر سايىسى بيىل تولەبي اۋدانىنداعى كەرەمەت تابيعات اياسىندا ۇيىمداستىرىلدى. قاتىسقان بارلىق اقىندارعا العىس ايتامىز. قازاقتىڭ ءتول ونەرى ايتىس – بۇل ءار ۇلتقا بۇيىرماعان ونەر. ءبىزدىڭ دانا حالقىمىز ءاردايىم اتالى سوزگە توقتاعان، ۋاجگە جۇگىنگەن. قيىننان قيىستىرىپ، ءسوز تابۋ، تاڭدى تاڭعا ۇرىپ، جىرلاۋ – قازاقتىڭ بويىندا ەجەلدەن كەلە جاتقان ءداستۇر. قازاققا قانمەن بەرىلگەن ايتىس ونەرى جاساي بەرسىن! جىر ءمۇشايراسىن ۇيىمداستىرۋعا اتسالىسقان بارلىق جاندارعا العىس ايتامىز، – دەدى شىڭعىس جۇمابەكۇلى.
ونەر سايىسى بيىل ەكىنشى رەت شىمكەنت قالالىق ىشكى ساياسات باسقارماسىنا قاراستى جاستار رەسۋرستىق ورتالىعى جانە قاراتاۋ ءداستۇرلى ونەر مەكتەبىنىڭ ۇيىمداستىرۋىمەن ءوتتى. جىر دوداسىنا ەلىمىزدىڭ تۇكپىر-تۇكپىرىنەن 16 اقىن مەن 16 ايتىسكەر قاتىستى. الدىمەن ىرىكتەۋ كەزەڭىنەن سۇرىنبەي وتكەن تالانتتى جاستاردىڭ ونەر كۇنگەي وڭىرىنە عانا ەمەس، ەلىمىزگە تانىمال اقىن بەكارىس شويبەكوۆ باستاعان ادىلقازىلار القاسى باعالادى. ادىلقازىلار قۇرامىندا بەلگىلى ايتىسكەر اقىن باۋىرجان حاليوللا، شىمكەنتتەگى ونەر مەكتەبىنىڭ ديرەكتورى مارجان ەسجانوۆا، «التىن دومبىرا» جۇلدەسىنىڭ ءۇش دۇركىن يەگەرى مۇحتار نيازوۆ، شىمكەنتتەگى ءال-فارابي اتىنداعى كىتاپحانانىڭ ديرەكتورى انار جاپپارقۇلوۆا بار.
سونىمەن، سايىس ناتيجەسى بويىنشا تۇركىستاندىق دانيال بولىسبەك باس جۇلدەنى جەڭىپ الدى. جەڭىمپازعا كۇمىسپەن اپتالعان دومبىرا تابىس ەتىلدى. ءبىرىنشى ورىندى الماتى قالاسىنان كەلگەن ايىم اسىلبەكقىزى الدى. ەكى ەكىنشى ورىندى قىزىلوردادان كەلگەن نۇراحمەت مانسۇروۆ جانە تۇركىستان وبلىسىنىڭ ساڭلاعى ايان نيازبەك ۇتىپ السا، ەكى ءۇشىنشى ورىندى شىمكەنتتىك جاس اقىندار نۇرعالي ءاناپيا مەن جاندوس مىرزابەكوۆ قانجىعاعا بايلادى.
ايتا كەتەيىك، «كۇمىس قالام» جانە «كۇمىس دومبىرا» سايىسى رەسپۋبليكالىق «التىن قالام» جانە «التىن دومبىرا» جىر دوداسىنا قاتىساتىن اعا بۋىن اقىنداردىڭ ءىزباسارلارىن دايىنداۋ ماقساتىندا قولعا الىنعان. ەكى كۇندىك جىر دوداسى تابيعاتى اسەم ورىندا ءوتتى. جاس اقىندار، جىر سايىسىنان بولەك، بەلگىلى ونەر يەلەرىمەن جۇزدەسىپ، شەبەرلىك ساعاتتارىنا قاتىستى.
