Úshinshi megapolıs mańyndaǵy «Baldáýren» demalys aımaǵynda jas aqyndar arasyndaǵy respýblıkalyq «Kúmis dombyra» aıtysy máresine jetti. Jyr dodasy bıyl qazaqtyń uly aǵartýshysy Abaı kúnine oraılastyrylǵan. Óner saıysyn Shymkent qalasy ákiminiń birinshi orynbasary Shyńǵys Muqan bastaǵan kórermender tamashalady.
– Jazba jáne aıtysker aqyndar arasyndaǵy «Kúmis qalam» jáne «Kúmis dombyra» baıqaýlary bıyl ekinshi ret ótýde. Byltyr Shymkent qalasynda ótken jyr saıysy bıyl Tólebı aýdanyndaǵy keremet tabıǵat aıasynda uıymdastyryldy. Qatysqan barlyq aqyndarǵa alǵys aıtamyz. Qazaqtyń tól óneri aıtys – bul ár ultqa buıyrmaǵan óner. Bizdiń dana halqymyz árdaıym ataly sózge toqtaǵan, ýájge júgingen. Qıynnan qıystyryp, sóz tabý, tańdy tańǵa uryp, jyrlaý – qazaqtyń boıynda ejelden kele jatqan dástúr. Qazaqqa qanmen berilgen aıtys óneri jasaı bersin! Jyr músháırasyn uıymdastyrýǵa atsalysqan barlyq jandarǵa alǵys aıtamyz, – dedi Shyńǵys Jumabekuly.
Óner saıysy bıyl ekinshi ret Shymkent qalalyq ishki saıasat basqarmasyna qarasty jastar resýrstyq ortalyǵy jáne Qarataý dástúrli óner mektebiniń uıymdastyrýymen ótti. Jyr dodasyna elimizdiń túkpir-túkpirinen 16 aqyn men 16 aıtysker qatysty. Aldymen irikteý kezeńinen súrinbeı ótken talantty jastardyń óner kúngeı óńirine ǵana emes, elimizge tanymal aqyn Bekarys Shoıbekov bastaǵan ádilqazylar alqasy baǵalady. Ádilqazylar quramynda belgili aıtysker aqyn Baýyrjan Halıolla, Shymkenttegi óner mektebiniń dırektory Marjan Esjanova, «Altyn dombyra» júldesiniń úsh dúrkin ıegeri Muhtar Nııazov, Shymkenttegi Ál-Farabı atyndaǵy kitaphananyń dırektory Anar Japparqulova bar.
Sonymen, saıys nátıjesi boıynsha túrkistandyq Danııal Bolysbek bas júldeni jeńip aldy. Jeńimpazǵa kúmispen aptalǵan dombyra tabys etildi. Birinshi oryndy Almaty qalasynan kelgen Aıym Asylbekqyzy aldy. Eki ekinshi oryndy Qyzylordadan kelgen Nurahmet Mansurov jáne Túrkistan oblysynyń sańlaǵy Aıan Nııazbek utyp alsa, eki úshinshi oryndy shymkenttik jas aqyndar Nurǵalı Ánapııa men Jandos Myrzabekov qanjyǵaǵa baılady.
Aıta keteıik, «Kúmis qalam» jáne «Kúmis dombyra» saıysy respýblıkalyq «Altyn qalam» jáne «Altyn dombyra» jyr dodasyna qatysatyn aǵa býyn aqyndardyń izbasarlaryn daıyndaý maqsatynda qolǵa alynǵan. Eki kúndik jyr dodasy tabıǵaty ásem orynda ótti. Jas aqyndar, jyr saıysynan bólek, belgili óner ıelerimen júzdesip, sheberlik saǵattaryna qatysty.
