ىشكى ىستەر مينيسترلىگى قازاقستاندىقتارعا SMS حابارلاما ارقىلى ەسكەرتۋ جاسادى، دەپ حابارلايدى «ادىرنا» ءتىلشىسى.
SMS ارقىلى الاياقتىق تۋرالى حالىقتى بىرىڭعاي حاباردار ەتۋ تۋرالى 4 تامىزدا ىشكى ىستەر ءمينيسترىنىڭ تسيفرلىق دامۋ مينيسترلىگىنىڭ وكىلدەرىمەن جانە بايلانىس وپەراتورلارىمەن كەزدەسۋىندە ايتىلعان بولاتىن.
ءموبيلدى بايلانىس قازاقستاننىڭ ءاربىر تۇرعىنىنا تۇرعىلىقتى جانە ورنالاسقان جەرىنە قاراماستان قولجەتىمدى بولعاندىقتان، SMS ارقىلى الاياقتىق فاكتىلەرى تۋرالى اقپارات بەرۋ ازاماتتاردى جەدەل حاباردار ەتۋگە مۇمكىندىك بەرەدى.
ءىىم ساقتىق شارالارىن ەسكە سالادى:
– اقشانى قاۋىپسىز شوتتارعا اۋدارۋ، نەسيەنى راسىمدەۋ تۋرالى وزدەرىن بانك نەمەسە قۇقىق قورعاۋ ورگاندارىنىڭ قىزمەتكەرى رەتىندە تانىستىرعان ادامداردىڭ تەلەفون ارقىلى نۇسقاۋلىقتارىنا ەرمەۋ قاجەت. قۇقىق قورعاۋ ورگاندارى ارنايى وپەراتسيالاردى تەلەفون ارقىلى جۇرگىزبەيدى;
– وزدەرىن بانك، پوليتسيا قىزمەتكەرلەرى رەتىندە تانىستىرعان ادامدارعا دەربەس دەرەكتەردى، پلاستيكالىق كارتالاردىڭ دەرەكتەمەلەرىن، اۋدارىمدار تۋرالى تۇبىرتەكتەردى، اسىرەسە كودتار مەن قۇپيا سوزدەردى حابارلاماڭىز;
– بەلگىسىز جانە تەكسەرىلمەگەن سايتتارعا جانە باسقا كوزدەرگە جەكە دەرەكتەردى بەرمەڭىز. تەكسەرۋسىز الدىن الا تولەم جۇرگىزبەڭىز. تاۋاردى العاننان كەيىن تولەم جاساۋعا كەلىسۋگە تىرىسىڭىز;
– كۇماندى شارتتار بويىنشا اۋدارىمداردى جۇزەگە اسىرماڭىز;
– قوسىمشالاردى ورناتۋ ءۇشىن تەك رەسمي App Store مەن Play Market كوزدەرىن پايدالانىڭىز;
– بەلگىسىز ادامداردان كەلىپ تۇسكەن سىلتەمەگە كىرمەڭىز. كوبىنەسە الاياقتار تولەم جاساۋ ءۇشىن فيشينگتىك بولىپ تابىلاتىن سىلتەمە بويىنشا ءوتۋدى ۇسىنادى;
– بانكينگ قىزمەتىنە قول جەتكىزۋ قۇپيا سوزدەرىن ءجيى وزگەرتىپ وتىرىڭىز. 3D-قورعاۋدى جانە بانكتەر ۇسىناتىن باسقا قاۋىپسىزدىك شارالارىن قولدانىڭىز;
– ءوز شوتتارىڭىزداعى اقشا اينالىمىن ءجيى تەكسەرۋ قاجەت.
