استانا قالاسى اكىمدىگى اۆتوبۋستىڭ جول اپاتىنا ۇشىراۋى كەزىندە زارداپ شەگىپ، اياعىنان ايىرىلعان جەتى جاسار قىزدىڭ وتباسىنا قانداي كومەك تۇرلەرى كورسەتىلەتىنىن ايتتى، دەپ حابارلايدى “ادىرنا”.
"استانا قالاسىندا بولعان جول-كولىك وقيعاسىنا بايلانىستى زارداپ شەككەن بالانىڭ وتباسىنا العاشقى كۇننەن باستاپ جان-جاقتى كومەك كورسەتىلىپ جاتىر. اكىمدىك پەن اۆتوبۋس پاركىنىڭ وكىلدەرى بالانىڭ اتا-اناسىمەن جانە تۋىستارىمەن كەزدەسكەن", دەپ حابارلادى ەلوردا اكىمدىگى.
قولداۋ كورسەتۋ بويىنشا مىناداي شارالار بەلگىلەندى:
- اۆتوبۋس پاركى ساقتاندىرۋ ءپوليسى ەسەبىنەن 19,6 ميلليون تەڭگە كولەمىندە ساقتاندىرۋ تولەمى (قازىرگى ۋاقىتتا زاڭ اياسىندا ءتيىستى راسىمدەر جۇرگىزىلۋدە);
- قوسىمشا اۆتوبۋس پاركى تاراپىنان 10 ميلليون تەڭگە كولەمىندە دەمەۋشىلىك كومەك كورسەتۋ تۋرالى شەشىم قابىلداندى;
- وتباسى اقمولا وبلىسىنان بولعاندىقتان، ەمدەلۋ جانە وڭالۋ كەزەڭىندە ۋاقىتشا باسپانا جالداۋ بويىنشا كومەك ۇسىنىلدى;
- مەديتسينالىق جانە پسيحولوگيالىق كومەك كورسەتىلىپ جاتىر;
- الەۋمەتتىك قولداۋ ماسەلەلەرى بويىنشا سۇيەمەلدەۋ قامتاماسىز ەتىلىپ جاتىر.
"بالانىڭ جاعدايى تۇراقتى، ول بەيىندى بولىمشەگە اۋىستىرىلدى. زارداپ شەككەن قىز بالانىڭ تۋىستارىنا قابىلدانعان جانە ۇسىنىلعان شارالار تۋرالى تولىق اقپارات بەرىلدى", دەپ ناقتىلايدى اكىمدىك.
سونىمەن قاتار، اۋرۋحانادا جاتقان ەكى ناۋقاسقا دا جان-جاقتى كومەك كورسەتىلىپ جاتىر. ولار دا ساقتاندىرۋ تولەمىن الاتىنى ناقتىلانادى.
ايتا كەتەيىك، اۆتوبۋستىڭ قاتىسۋىمەن بولعان جول-كولىك وقيعاسى 2025 جىلعى 2 ماۋسىمدا كەشكە استانادا بولدى. اپات كەزىندە مەكتەپ وقۋشىسى قوعامدىق كولىكتە بولعان. سوققى كەزىندە بالا قاتتى قىسىلىپ قالىپ، اياعىن قاتتى جاراقاتتادى. الايدا زاقىمدانعان اياقتى امان الىپ قالۋ مۇمكىن بولمادى. 4 ماۋسىمدا دارىگەرلەر زارداپ شەككەن قىزدىڭ ەسىن جيعانىن حابارلادى.
