مينيستر جي-ءدى قالاي قولداناتىنىن ايتتى

فوتو جي-مەن جاسالعان

عىلىم جانە جوعارى ءبىلىم ءمينيسترى ساياسات نۇربەك جاساندى ينتەللەكتىنى كۇندەلىكتى جۇمىسىندا قالاي پايدالاناتىنىن جانە كۇردەلى اقپاراتتى قاراپايىم تىلمەن تۇسىنۋگە كومەكتەسەتىن سۇرانىس ۇلگىسىن كورسەتتى، دەپ حابارلايدى "ادىرنا" ءتىلشىسى.

ءمينيستردىڭ ايتۋىنشا، جاساندى ينتەللەكت ادامنىڭ جۇمىسىن الماستىرماي، وقۋ مەن ىزدەنىس بارىسىندا كومەكشى قۇرال رەتىندە قولدانىلۋى كەرەك.

«مەن قازىر ونى كۇندەلىكتى قىزمەتىمدە دە پايدالانامىن. ءبىر نارسەنى جىلدام ءتۇسىنۋ قاجەت بولسا، مىناداي سۇرانىس بەرەمىن: “ماعان بۇل ماسەلەنى ون جاستاعى بالاعا تۇسىندىرگەندەي، بارىنشا قاراپايىم، دايەكتى ءارى كورنەكى تۇردە ءتۇسىندىرىپ بەرشى”. وسىلايشا كۇردەلى سۇراقتىڭ ءمانىن ءتۇسىنۋ جەڭىلدەيدى»، – دەدى ساياسات نۇربەك.

سونداي-اق مينيستر ستۋدەنتتەردىڭ ديپلومدىق جانە عىلىمي-زەرتتەۋ جۇمىستارىن جازۋ كەزىندە جاساندى ينتەللەكتىنى پايدالانۋىنا قاتىستى پىكىر ءبىلدىردى. ونىڭ سوزىنشە، قازاقستان ءبىلىم بەرۋ جۇيەسىندە بۇل تەحنولوگياعا تولىق تىيىم سالماي، ونى بەلگىلى ءبىر تالاپتار مەن شەكتەۋلەر اياسىندا قولدانۋعا مۇمكىندىك بەرۋدى تاڭداعان.

اتاپ ايتقاندا، ستۋدەنتتەرگە زەرتتەۋ جۇمىستارىنىڭ تالداۋ بولىمدەرىن، تۇجىرىمدارى مەن قورىتىندىلارىن جاساندى ينتەللەكت كومەگىمەن جازۋعا بولمايدى. ويتكەنى بۇل بولىمدەر ءبىلىم الۋشىنىڭ جەكە ىزدەنىسى مەن وزىندىك پىكىرىن كورسەتۋى ءتيىس. ال جي قولدانىلعان جاعدايدا، جۇمىستا قانداي قۇرال پايدالانىلعانىن جانە ونىڭ اقپاراتتى وڭدەۋگە نەمەسە دەرەكتەردى جيناۋعا قالاي كومەكتەسكەنىن كورسەتۋ قاجەت.

ساياسات نۇربەك جاساندى ينتەللەكت ءبىلىم الۋدى الماستىرماي، كەرىسىنشە، ونى تولىقتىرۋى كەرەك ەكەنىن اتاپ ءوتتى.

مينيستر مىسال رەتىندە زەرتتەۋ ناتيجەلەرىن كەلتىردى. وعان سايكەس، تاپسىرمالاردى ءوز بەتىنشە ورىنداۋدىڭ ورنىنا جاساندى ينتەللەكتىگە سۇيەنگەن ستۋدەنتتەر ەمتيحانداردا تومەن ناتيجە كورسەتكەن. ال ونى كومەكشى، تالىمگەر جانە ءبىلىمىن تەكسەرۋ قۇرالى رەتىندە پايدالانعان ءبىلىم الۋشىلاردىڭ كورسەتكىشى جوعارى بولعان.

بۇدان بولەك، مينيستر اقش-تىڭ ETS (Educational Testing Service) كومپانياسىمەن بىرلەسىپ جاڭا تەست ازىرلەنىپ جاتقانىن مالىمدەدى. ول ءبىلىم دەڭگەيىمەن قاتار، لوگيكالىق ويلاۋ قابىلەتىن، تسيفرلىق ساۋاتتىلىقتى جانە جاساندى ينتەللەكتىنى قولدانۋ داعدىلارىن باعالاۋعا باعىتتالعان. تەستتى كەلەسى جىلى پيلوتتىق رەجيمدە ىسكە قوسۋ جوسپارلانىپ وتىر.