Foto Jİ-men jasalǧan
Ǧylym jäne joǧary bılım ministrı Saiasat Nūrbek jasandy intellektını kündelıktı jūmysynda qalai paidalanatynyn jäne kürdelı aqparatty qarapaiym tılmen tüsınuge kömektesetın sūranys ülgısın körsettı, dep habarlaidy "Adyrna" tılşısı.
Ministrdıŋ aituynşa, jasandy intellekt adamnyŋ jūmysyn almastyrmai, oqu men ızdenıs barysynda kömekşı qūral retınde qoldanyluy kerek.
«Men qazır ony kündelıktı qyzmetımde de paidalanamyn. Bır närsenı jyldam tüsınu qajet bolsa, mynadai sūranys beremın: “Maǧan būl mäselenı on jastaǧy balaǧa tüsındırgendei, barynşa qarapaiym, däiektı ärı körnekı türde tüsındırıp berşı”. Osylaişa kürdelı sūraqtyŋ mänın tüsınu jeŋıldeidı», – dedı Saiasat Nūrbek.
Sondai-aq ministr studentterdıŋ diplomdyq jäne ǧylymi-zertteu jūmystaryn jazu kezınde jasandy intellektını paidalanuyna qatysty pıkır bıldırdı. Onyŋ sözınşe, Qazaqstan bılım beru jüiesınde būl tehnologiiaǧa tolyq tyiym salmai, ony belgılı bır talaptar men şekteuler aiasynda qoldanuǧa mümkındık berudı taŋdaǧan.
Atap aitqanda, studentterge zertteu jūmystarynyŋ taldau bölımderın, tūjyrymdary men qorytyndylaryn jasandy intellekt kömegımen jazuǧa bolmaidy. Öitkenı būl bölımder bılım aluşynyŋ jeke ızdenısı men özındık pıkırın körsetuı tiıs. Al Jİ qoldanylǧan jaǧdaida, jūmysta qandai qūral paidalanylǧanyn jäne onyŋ aqparatty öŋdeuge nemese derekterdı jinauǧa qalai kömekteskenın körsetu qajet.
Saiasat Nūrbek jasandy intellekt bılım aludy almastyrmai, kerısınşe, ony tolyqtyruy kerek ekenın atap öttı.
Ministr mysal retınde zertteu nätijelerın keltırdı. Oǧan säikes, tapsyrmalardy öz betınşe oryndaudyŋ ornyna jasandy intellektıge süiengen studentter emtihandarda tömen nätije körsetken. Al ony kömekşı, tälımger jäne bılımın tekseru qūraly retınde paidalanǧan bılım aluşylardyŋ körsetkışı joǧary bolǧan.
Būdan bölek, ministr AQŞ-tyŋ ETS (Educational Testing Service) kompaniiasymen bırlesıp jaŋa test äzırlenıp jatqanyn mälımdedı. Ol bılım deŋgeiımen qatar, logikalyq oilau qabıletın, sifrlyq sauattylyqty jäne jasandy intellektını qoldanu daǧdylaryn baǧalauǧa baǧyttalǧan. Testtı kelesı jyly pilottyq rejimde ıske qosu josparlanyp otyr.
