2026 جىلدىڭ 15 قاڭتارىندا Rustem Omarov YouTube-ارناسىندا (سونداي-اق سەريا سيپاتتاماسىندا كورسەتىلگەن پلاتفورمالاردا) قازاقستاندىق تانىمال «موشەننيكي» سەريالىنىڭ ەكىنشى ماۋسىمىنىڭ تۇساۋكەسەرى وتەدى.
ءارتۇرلى الاياقتىق سحەمالارعا ماماندانعان سالقىنقاندىلىقپەن ارەكەت ەتەتىن قىلمىسكەر ءداميردىڭ وقيعالارىن باياندايتىن اۆانتيۋرالىق ساگا بۇل جولى تۇركيادان باستالادى. وندا ول تمد ەلدەرىنىڭ تۇرعىندارىنا تۇرىك جىلجىمايتىن مۇلكىن ساتۋ ارقىلى اۋقىمدى الاياقتىقتى جۇزەگە اسىرادى. شەتەلدەگى ىستەرىن اياقتاعان سوڭ، دامير وتانىنا ورالىپ، ءبىرىنشى ماۋسىمنان كورەرمەنگە تانىس كەيىپكەرلەردەن ءوز كومانداسىن قايتا جينايدى.
بۇل ماۋسىمدا دامير مەن ونىڭ كومانداسى قازىرگى زامانعى، شىنايى قىلمىسكەرلەر قولداناتىن جاڭا ءارى وزەكتى الاياقتىق سحەمالارىن ىسكە اسىرادى. ولاردىڭ قاتارىندا تسيفرلىق تەحنولوگيالارمەن بايلانىستى، ونىڭ ىشىندە جاساندى ينتەللەكتىنى قولداناتىن الاياقتىق سحەمالارى دا بار.
جوبانىڭ ەكىنشى ماۋسىمى Salem Entertainment پەن BAS Production كومپانيالارىنىڭ بىرلەسكەن ەڭبەگىنىڭ ناتيجەسىندە جۇزەگە استى. وسىعان دەيىن ءبىرىنشى ماۋسىمنىڭ تىزگىنىن ۇستاعان ولجاس نۇرباي، ەكىنشى ماۋسىمنىڭ دا قويۋشى-رەجيسسەرى بولدى.
جوبا اۆتورلارىنىڭ نەگىزگى ماقساتى ساپالى ويىن-ساۋىق كونتەنتىن ۇسىنۋ عانا ەمەس، قازىرگى قوعامداعى ەڭ وزەكتى ءارى وتكىر ماسەلەلەردىڭ ءبىرىن اشىپ كورسەتۋ. سەريالدا بارىنە تانىمال الاياقتىق سحەمالار قىلمىسكەرلەردءىڭ تاراپىنان باياندالادى.
سەريالداعى ءاربىر وقيعا وزىندىك ەرەكشەلىگىمەن دارالانىپ، ال سوڭى ەشكىم كۇتپەگەندەي اياقتالادى. كورەرمەنگە اۆتوكولىك الىپساتارلاردان باستاپ، ينتەرنەت-فيشينگكە دەيىنگى قىلمىستىق ارەكەتتەردىڭ ىشكى مەحانيزمى كورسەتىلەدى.
سەريالدىڭ باستى مىندەتى — كورەرمەندى اقپاراتتاندىرۋ جانە قورعاۋ، الاياقتاردىڭ ناقتى قالاي ارەكەت ەتەتىنىن كورسەتۋ. وسى ارقىلى ءاربىر ادام ولاردىڭ ادىستەرىن تانىپ، قۇربان بولماي، اباي بولۋدى ۇيرەنەدى. ويتكەنى، ءاربىر ادام مۇنداي الاياقتىقپەن كەزدەسكەن نەمەسە بولاشاقتا كەزدەسىپ قالۋى مۇمكىن.
«موشەننيكي» جوباسىنىڭ يدەيالىق شابىتتاندىرۋشىسى، پروديۋسەرى ءارى باستى ءرولدى سومداۋشى — قازاقستاندىق تانىمال اكتەر رۋستەم وماروۆ:
— ەكىنشى ماۋسىمدى دايىنداۋ بارىسىندا ءبىز قويىلعان دەڭگەيدى ەش جاعدايدا تومەندەتۋگە بولمايتىنىن ناقتى تۇسىندىك. سوندىقتان جوبانىڭ جالعاسى گەوگرافيالىق تۇرعىدان دا، قامتىلعان شىنايى الاياقتىق كەيستەرى بويىنشا دا اۋقىمدىراق بولدى. سونىمەن قاتار، بۇل ماۋسىمدا كورەرمەن فاريزا كەيىپكەرىمەن بايلانىستى ەڭ ينتريگالىق سيۋجەت جەلىلەرىنىڭ ءبىرىنىڭ شەشىمىن كورەدى جانە كورەرمەننىڭ كوڭىلىنەن شىعاتىن جاڭا كەيىپكەرلەرمەن تانىسادى.
«موشەننيكي» سەريالىنىڭ ەكىنشى ماۋسىمى ءداميردىڭ وقيعاسىن اياقتامايدى، كەرىسىنشە 2026 جىلدىڭ كوكتەمىندە كينوتەاترلاردا پروكاتقا شىعاتىن وسى اتتاس تولىقمەتراجدى فيلمگە دايىندىق قىزمەتىن اتقارادى.
