9 قاراشا، تاراز. قۇرىلتاي دەپۋتاتى ءابىلحايىر تامابەك جامبىل وبلىسىنىڭ تۇرعىندارىمەن كەزدەسىپ، مەملەكەت باسشىسىنىڭ جولداۋىندا بەلگىلەنگەن مىندەتتەردى ءتۇسىندىردى. كەزدەسۋدە ءوڭىردىڭ اگروونەركاسىپ سالاسىنىڭ وكىلدەرى جولداۋداعى باسىم باعىتتار مەن جەرگىلىكتى تۇرعىنداردى تولعاندىرعان ماسەلەلەر بويىنشا ءوز ۇسىنىستارىن جەتكىزدى.
جيىنعا قازاقستان حالىق كەڭەسىنىڭ مۇشەسى ءۋاليحان بولاتبەك، اۋىل شارۋاشىلىعى، ەنەرگەتيكا، ەڭبەك جانە حالىقتى الەۋمەتتىك قورعاۋ، سۋ رەسۋرستارى جانە يرريگاتسيا، ۇلتتىق ەكونوميكا ۆيتسە-مينيسترلەرى دە قاتىستى.
اگروونەركاسىپ كەشەنىنىڭ وكىلدەرىمەن وتكەن كەزدەسۋدە اۋىل شارۋاشىلىعىنىڭ الەۋەتىن ارتتىرۋ، سۋ رەسۋرستارىن ءتيىمدى پايدالانۋ، ءوندىرىستى جاڭعىرتۋ، اۋىل شارۋاشىلىعى تاۋارىن وندىرۋشىلەردى قولداۋ جانە اۋىلداعى كاسىپكەرلىكتى دامىتۋ ماسەلەلەرى كوتەرىلءدى.
جامبىل وبلىسى ءۇشىن اگروونەركاسىپ كەشەنى – ەكونوميكانىڭ ماڭىزدى سالالارىنىڭ ءبىرى. سوندىقتان اۋىل شارۋاشىلىعى ونىمدەرىن وندىرۋمەن قاتار، ولاردى وڭدەۋ، ساقتاۋ جانە نارىققا شىعارۋ جۇمىستارىن جەتىلدىرۋ دە وزەكتى.
دەپۋتات ءابىلحايىر تامابەك وڭىردەگى سۋ رەسۋرستارىن ءتيىمدى پايدالانۋ ماسەلەسىنە ارنايى توقتالدى.
– جامبىل وبلىسى جەر استى سۋلارىن پايدالانۋ كولەمى بويىنشا رەسپۋبليكاداعى الدىڭعى قاتارلى وڭىرلەردىڭ ءبىرى. وبلىس اۋماعىنىڭ ۇشتەن ءبىر بولىگىندە تۇرعىندار مەن شارۋاشىلىق نىساندارى جەر استى سۋىن پايدالانادى. الايدا بۇل قور شەكسىز ەمەس. سوندىقتان سۋ رەسۋرستارىن ۇنەمدى پايدالانۋ جانە ساقتاۋ جولدارىن قازىردەن باستاپ قاراستىرۋىمىز قاجەت. مەملەكەت باسشىسى جولداۋىندا سۋ رەسۋرستارىن ەسەپكە الۋ نەگىزىندە ۇلتتىق سۋ رەسۋرستارىنىڭ اقپاراتتىق جۇيەسىن قۇرۋ جۇمىستارىن جەدەلدەتۋدى تاپسىردى. بۇل جۇيە سۋدى ءتيىمدى پايدالانۋعا، سونداي-اق سۋ قۇبىرلارى مەن جەتكىزۋجەلىلەرىندەگى شىعىندى ازايتۋعا مۇمكىندىك بەرەدى, – دەدى دەپۋتات.
جيىنعا قاتىسۋشىلار اگرارلىق سالاداعى وزگەرىستەر شارۋاشىلىقتاردىڭ دامۋىنا جانە اۋىل تۇرعىندارىنىڭ تابىسىن ارتتىرۋعا ىقپال ەتۋى كەرەكتىگىن اتاپ ءوتتى. سونىمەن قاتار وڭىردەگى اۋىل شارۋاشىلىعىن دامىتۋ جانە سالاداعى ماسەلەلەردى شەشۋ جولدارىن قاراستىردى.
