يزرايل پرەزيدەنتى يتسحاك گەرتسوگ ەلدە جاڭا ۇكىمەت قۇرۋ جونىندەگى مانداتتى بۇرىنعى باس شتاب باستىعى، «ياشار» پارتياسىنىڭ جەتەكشىسى گادي ايزەنكوتقا بەرۋ تۋرالى شەشىم قابىلدادى. بۇل تۋرالى Al Jazeera تەلەارناسى جازدى، دەپ حابارلايدى “ادىرنا”.
پرەزيدەنتتىڭ بۇل شەشىمى تۋرالى ساياساتكەرگە 7 قاراشا كۇنى كەشكە حابارلانعان. ال ۇكىمەت جاساقتاۋعا ارنالعان رەسمي ماندات 8 قاراشادا تابىستالماق.
يتسحاك گەرتسوگ مۇنداي شەشىمگە 27 قازاندا وتكەن پارلامەنتتىك سايلاۋدان كەيىن پارتيا وكىلدەرىمەن وتكىزىلگەن كونسۋلتاتسيالاردىڭ ناتيجەسىندە كەلگەن. كەلىسسوز بارىسىندا كنەسسەتتەگى 67 دەپۋتاتتىق ورىندى يەلەنگەن ساياسي كۇشتەردىڭ وكىلدەرى گادي ايزەنكوتتىڭ كانديداتۋراسىن قولداعان. ال قازىرگى پرەمەر-مينيستر بينيامين نەتانياحۋدى 46 دەپۋتات قولداعان.
ايزەنكوتقا جاڭا بيلەۋشى كواليتسيانى قالىپتاستىرۋ ءۇشىن 28 كۇن بەرىلەدى. ەگەر بۇل ۋاقىت جەتكىلىكسىز بولسا، مەرزىمدى قوسىمشا 14 كۇنگە ۇزارتۋعا بولادى.
الايدا جاڭا ۇكىمەتتى جاساقتاۋ وڭايعا سوقپايىن دەپ تۇر. سەبەبى كنەسسەتتەگى 120 ورىننىڭ كەمىندە 61-ىنە يە بولعان ساياسي كۇش قانا پارلامەنتتىك باسىمدىققا قول جەتكىزە الادى. سايلاۋ ناتيجەسىندە ايزەنكوت باستاعان اليانس 48 ماندات يەلەنسە، نەتانياحۋ بلوگى 53 ورىنعا يە بولعان. ال قالعان 19 دەپۋتاتتىق ورىن اراب پارتيالارىنا تيەسىلى.
ايزەنكوتتىڭ كانديداتۋراسىن ۇسىنۋ كەزىندە اراب پارتيالارىنىڭ كەيبىرى ونى قولداعانىمەن، ساياساتكەر ولاردىڭ وكىلدەرىن بولاشاق ۇكىمەت قۇرامىنا ەنگىزۋ جوسپارى جوق ەكەنىن بۇعان دەيىن مالىمدەگەن. وسىعان بايلانىستى وعان پارلامەنتتەگى وزگە ساياسي كۇشتەرمەن كەلىسىمگە كەلىپ، قاجەتتى داۋىس سانىن جيناۋعا تۋرا كەلەدى.
ەگەر گادي ايزەنكوت بەلگىلەنگەن مەرزىم ىشىندە ۇكىمەت جاساقتاي الماسا، يزرايل پرەزيدەنتى بۇل مىندەتتى باسقا ۇمىتكەرگە تاپسىرۋى مۇمكىن.
ال جاڭا كابينەت جاساقتالعانعا دەيىن بينيامين نەتانياحۋ پرەمەر-مينيستر قىزمەتىن ۋاقىتشا اتقارا بەرەدى.
