پولشا پرەمەر-ءمينيسترى دونالد تۋسك كونستيتۋتسيالىق تريبۋنالعا بايلانىستى پرەزيدەنت كارول ناۆروتسكيمەن جانە ونى قولدايتىن «قۇقىق جانە ادىلەتتىلىك» پارتياسىمەن ىمىراعا كەلمەيتىنىن مالىمدەدى. بۇل تۋرالى ول 31 قازاندا ەل ازاماتتارىنا جاساعان ۇندەۋىندە ايتتى, دەپ حابارلايدى “ادىرنا”.
داۋدىڭ ورشۋىنە كونستيتۋتسيالىق تريبۋنال سۋدياسى اننا كورۆين-پيوتروۆسكانىڭ وسى ورگاننىڭ توراعاسى بوگدان سۆەنچكوۆسكي مەن ونىڭ ورىنباسارى بارتولومەي سوحانسكيدى ۋاقىتشا قىزمەتىنەن شەتتەتۋ تۋرالى شەشىمى سەبەپ بولعان.
تۋسك ۇكىمەتىنىڭ پىكىرىنشە، تريبۋنال باسشىلارى قاجەتتى شەشىمدەردىڭ قابىلدانۋىنا كەدەرگى كەلتىرگەن. سونىمەن قاتار پرەزيدەنت ناۆروتسكي پولشا پارلامەنتى سايلاعان جاڭا سۋديالاردى انت قابىلداتۋدان باس تارتقان.
پرەمەر-مينيستر كونستيتۋتسيالىق تريبۋنالدىڭ بۇرىنعى قۇرىلىمىن سىناپ، پرەزيدەنت ناۆروتسكي مەن ونىڭ الدىنداعى اندجەي دۋدانى ەلدەگى قۇقىق ۇستەمدىگىن بۇزدى دەپ ايىپتادى.
تۋسكتىڭ ايتۋىنشا، بيلىك قۇقىق ۇستەمدىگىن قالپىنا كەلتىرۋگە باعىتتالعان زاڭدار مەن قارارلاردى ۇسىنعانىمەن، پرەزيدەنت پەن «قۇقىق جانە ادىلەتتىلىك» پارتياسى ولاردىڭ قابىلدانۋىنا كەدەرگى كەلتىرگەن.
«كەيبىر ماسەلەلەر بويىنشا ىمىراعا كەلۋگە بولمايدى. ايقاي مەن وتىرىك پولشادا زاڭنىڭ قاينار كوزى بولا المايدى جانە بولمايدى دا»، – دەدى ول.
30 قازان كۇنى كونستيتۋتسيالىق تريبۋنال باسشىلارىنىڭ قىزمەتتەن شەتتەتىلۋىنە بايلانىستى عيمارات ماڭىنا نارازىلىق بىلدىرۋشىلەر جينالدى. كەيىن پوليتسيا تريبۋنال اۋماعىن قورشاۋعا الدى.
سول كۇنى سەنەگالعا بەت العان پرەزيدەنت كارول ناۆروتسكي ۇشاعىن كەرى بۇرىپ، ۆارشاۆاعا ورالدى. ول قىزمەتىنەن شەتتەتىلگەن تريبۋنال توراعاسى بوگدان سۆەنچكوۆسكيمەن جانە جوعارعى سوتتىڭ ءبىرىنشى توراعاسى زبيگنەۆ كاپينسكيمەن كەزدەستى.
31 قازانعا قاراعان ءتۇنى ناۆروتسكي كاپينسكيمەن بىرگە كونستيتۋتسيالىق تريبۋنال عيماراتىنا كىرىپ، تاڭعى ساعات 05:00-گە دەيىن سوندا بولعان.
كەيىن پرەزيدەنت پارلامەنتتىك فراكتسيالاردىڭ جەتەكشىلەرىمەن كەزدەسۋ وتكىزدى. وعان بيلەۋشى كواليتسيانىڭ كەيبىر وكىلدەرى قاتىسقانىمەن، تۋسك باستاعان «ازاماتتىق كواليتسيا» پرەزيدەنتتىڭ شاقىرۋىن قابىلدامادى.
قازىرگى ۋاقىتتا پولشادا كونستيتۋتسيالىق تريبۋنالدىڭ جۇمىسىنا قاتىستى ساياسي قايشىلىق جالعاسىپ جاتىر. دونالد تۋسك تريبۋنالدىڭ كونستيتۋتسياعا سايكەس قاۋىپسىز جۇمىس ىستەۋىن قامتاماسىز ەتۋ ونىڭ مىندەتى ەكەنىن مالىمدەدى.
