تۇركىستان وبلىسىندا پوليتسيا فورماسىن كيىپ، جول بويىندا كولىك توقتاتقان 10 جاسار سامۇرىققا كىتاپ سىيلاندى، دەپ حابارلايدى “ادىرنا” ۇلتتىق پورتالى.
ونى وبلىستىڭ باس پوليتسەيى ارنايى قابىلدادى. كەزدەسۋ بارىسىندا بالاعا پرەزيدەنت قاسىم-جومارت توقاەۆتىڭ كىتابى سىيعا بەرىلدى.
تۇركىستان وبلىسى پد كەزدەسۋدەن بەينەجازبا جاريالادى. قابىلداۋعا سامۇرىق اكەسىمەن بىرگە كەلگەن. بالا بۇل جولى دا پوليتسيا فورماسىن كيگەن.
ەسكە سالايىق، بۇعان دەيىن الەۋمەتتىك جەلىدە پوليتسيا كيىمىن كيگەن بالانىڭ جول جيەگىندە كولىكتەردى توقتاتىپ جۇرگەن ۆيدەوسى تاراعان ەدى. وسى وقيعادان كەيىن ونىڭ اكەسىنە اكىمشىلىك ايىپپۇل سالىندى.
پوليتسيا دەپارتامەنتى تۇسىنىكتەمە بەرىپ، ماسەلە بالانىڭ پوليتسيا قىزمەتكەرى بولۋعا دەگەن ارمانىندا ەمەس، جول بويىندا كولىك توقتاتۋى ونىڭ ءومىرى مەن دەنساۋلىعىنا قاۋىپ توندىرەتىنىندە ەكەنىن حابارلاعان.
كەيىن تۇركىستان وبلىسى پد باستىعى، پوليتسيا گەنەرال-مايورى ارىستانعاني زاپپاروۆ سامۇرىقتى ارنايى قابىلدادى.
پوليتسيانىڭ مالىمەتىنشە، سۇلتانحان سامۇرىق دوسجانۇلى ءۇش جاسىنان باستاپ پوليتسيا فورماسىن كيىپ، بولاشاقتا ءتارتىپ ساقشىسى بولۋدى ارماندايدى. ول ادامدارعا كومەكتەسىپ، زاڭ مەن ءتارتىپتى قورعاۋدى ماقسات ەتەدى.
كەزدەسۋ بارىسىندا ارىستانعاني زاپپاروۆ بالانىڭ ارمانىن قولداپ، پوليتسيا قىزمەتكەرى بولۋ ءۇشىن جاقسى ءبىلىم الىپ، ءتارتىپتى بولۋدىڭ ماڭىزىن ءتۇسىندىردى. سونداي-اق وعان مەملەكەت باسشىسىنىڭ كىتابىن تابىستادى.
بۇدان بولەك، دەپارتامەنت باستىعى سامۇرىق وقيتىن مەكتەپتە «جاس ساقشى» پوليتسيا سىنىبىن اشۋدى تاپسىردى. سونداي-اق بالانى پوليتسيا دەپارتامەنتىنىڭ الداعى ءىس-شارالارىنا قاتىستىرىپ، ءتارتىپ ساقشىلارىنىڭ كۇندەلىكتى قىزمەتىمەن تانىستىرۋ ۇسىنىلدى.
