2026 جىلعى ەگىن جيناۋ ناۋقانىنىڭ قورىتىندىسى بويىنشا قازاقستاندا 24,3 ملن توننا استىق جينالدى.
بۇل — سوڭعى 15 جىلداعى ەڭ جوعارى كورسەتكىشتەردىڭ ءبىرى. وسى ۋاقىت ارالىعىندا مۇنداي ناتيجەدەن جوعارى كورسەتكىش تەك ەكى رەت تىركەلگەن.
بۇل ناتيجە وتاندىق اۋىل شارۋاشىلىعىنىڭ مۇمكىندىگى جوعارى ەكەنىن جانە ديقانداردىڭ ەلدى ازىق-تۇلىكپەن قامتاماسىز ەتۋگە قوسقان ۇلەسىن كورسەتەدى.
بيىل جينالعان استىقتىڭ كولەمى عانا ەمەس، ساپاسى دا جاقسى. الدىن الا مالىمەتتەر بويىنشا، ەلەۆاتورلارعا تاپسىرىلعان جۇمساق بيدايدىڭ شامامەن 72%-ى ءۇشىنشى سىنىپقا جاتادى. زەرتتەلگەن بيداي ۇلگىلەرىنىڭ 48%-ىندا ءدان ماڭىزىنىڭ مولشەرى 28%-دان جوعارى. اقمولا وبلىسىندا ءۇشىنشى سىنىپتى بيدايدىڭ ۇلەسى 90%-عا، ال اقۋىزى جوعارى Hi-Pro ساناتىنداعى بيدايدىڭ ۇلەسى 70%-عا جەتتى.
استىق ساپاسىنىڭ جوعارى بولۋى ونى ازىق-تۇلىك وندىرۋگە كەڭىنەن پايدالانۋعا، وڭدەۋ كاسىپورىندارىن دامىتۋعا جانە قازاقستاندىق ءونىمنىڭ شەتەلدىك نارىقتارداعى باسەكەگە قابىلەتتىلىگىن ارتتىرۋعا مۇمكىندىك بەرەدى.
قازاقستان استىق ەكسپورتىندا دا جوعارى ناتيجەلەر كورسەتىپ وتىر. سوڭعى ەكى ماركەتينگتىك جىلدا ەلىمىز 15,5 ملن جانە 16 ملن توننا استىق پەن ۇن ەكسپورتتادى. بۇل — تاۋەلسىزدىك جىلدارىنداعى رەكوردتىق كورسەتكىشتەر.
«قازاقستان تەمىر جولى» ۇك» اق مالىمەتىنشە، 2026 جىلعى قىركۇيەكتەن 19 قازانعا دەيىن قازاقستان 1,657 ملن توننا استىق ەكسپورتتاعان. بۇل وتكەن كەزەڭمەن سالىستىرعاندا 9%-عا كوپ.
اۋىل شارۋاشىلىعىنىڭ ونىمدىلىگىن ارتتىرۋ ءۇشىن مەملەكەت اگرارشىلاردى قولداۋ جانە سالانى جاڭعىرتۋ جۇمىستارىن جالعاستىرىپ كەلەدى. اتاپ ايتقاندا، شارۋالارعا جەڭىلدەتىلگەن نەسيە بەرۋ، اۋىل شارۋاشىلىعى تەحنيكاسىن جاڭارتۋ، ساپالى تۇقىمدار مەن مينەرالدى تىڭايتقىشتاردى جەتكىزۋ، زاماناۋي تەحنولوگيالاردى ەنگىزۋ جۇمىستارىنا باسىمدىق بەرىلۋدە. سونىمەن قاتار جەر مەن سۋدى ءتيىمدى پايدالانۋ جانە كليماتتىڭ وزگەرۋىنە بەيىمدەلۋ ماسەلەلەرىنە كوڭىل بولىنۋدە.
سوڭعى ءۇش جىلدا مينەرالدى تىڭايتقىشتاردى قولدانۋ كولەمى ءۇش ەسەگە جۋىق ءوستى. 2025 جىلى شارۋالار 1,8 ملن توننا تىڭايتقىش پايدالانعان. ال 2026 جىلى جوسپارلانعان 2,3 ملن توننانىڭ 2,1 ملن تونناسى ەگىستىككە ەنگىزىلدى. ساپالى ەليتالىق تۇقىمداردىڭ ۇلەسى 12%-عا جەتتى. بۇل الداعى ۋاقىتتا ءونىم كولەمى مەن ساپاسىن ارتتىرۋعا ىقپال ەتەدى.
بيىل ەگىن جيناۋ جۇمىستارىنا 130 مىڭنان استام تراكتور، 29 مىڭ استىق جينايتىن كومباين، 17 مىڭ جاتكا جانە باسقا دا 130 مىڭعا جۋىق اۋىل شارۋاشىلىعى تەحنيكاسى جۇمىلدىرىلدى.
اۋىل شارۋاشىلىعى تەحنيكاسىن جاڭارتۋ ناتيجەسىندە ونىڭ توزۋ دەڭگەيى 2023 جىلعى 85%-دان 2025 جىلى 65%-عا دەيىن تومەندەدى. 2026 جىلدىڭ قورىتىندىسى بويىنشا تەحنيكانى جاڭارتۋ دەڭگەيىن 8%-عا جەتكىزۋ جوسپارلانىپ وتىر.
شارۋالارعا تەحنيكا ساتىپ الۋعا جەڭىلدەتىلگەن ليزينگ باعدارلاماسى دا كومەكتەسۋدە. باعدارلاما باستالعالى بەرى اگرارشىلار 12,7 مىڭنان استام تراكتور مەن 2 340 استىق جينايتىن كومباين ساتىپ الدى. بۇگىندە وسى باعدارلاما ارقىلى الىنعان تەحنيكا ەلىمىزدەگى تراكتورلار مەن استىق جينايتىن كومباينداردىڭ جالپى سانىنىڭ شامامەن 10%-ىن قۇرايدى.
الداعى ۋاقىتتا اۋىل شارۋاشىلىعىنداعى نەگىزگى مىندەتتەر — ءونىم كولەمىن ارتتىرۋ، استىق ساپاسىن جاقسارتۋ، زاماناۋي تەحنولوگيالاردى كەڭىنەن ەنگىزۋ جانە شارۋالاردى قاجەتتى تەحنيكامەن، تۇقىممەن، تىڭايتقىشپەن قامتاماسىز ەتۋ.
بۇل جۇمىستار اۋىل شارۋاشىلىعىنىڭ تۇراقتى دامۋىنا، كليماتتىق وزگەرىستەر مەن سىرتقى قيىندىقتارعا توتەپ بەرۋىنە جانە ەلىمىزدىڭ ەكسپورتتىق الەۋەتىن ارتتىرۋعا مۇمكىندىك بەرەدى.
