استانادا قازاقتىڭ ۇلتتىق قولونەرىن دارىپتەۋگە ارنالعان شىعارماشىلىق جوبا حالىقارالىق دەڭگەيدە مويىندالدى. قوي جۇنىنەن جاسالعان 500 كارتينادان تۇراتىن كوللەكتسيا Global Best of Records (GBR) ۇيىمىنىڭ سەرتيفيكاتىنا ەنىپ، الەمدەگى ەڭ ءىرى جيناق رەتىندە تىركەلدى.
حالىقارالىق سەرتيفيكات 2026 جىلعى 29 قازاندا بەرىلگەن. رەكورد يەگەرى رەتىندە داۋلەتجان ەدىگە، ال كوللەكتسيا اۆتورى رەتىندە ءلاززات اتىباي كورسەتىلگەن. جەتىستىك ەتنومادەنيەت جانە ۇلتتىق داستۇرلەر ساناتىنا ەنگىزىلگەن.
جوبانى استانا قالاسىنداعى س. سادۋاقاسوۆ اتىنداعى №78 مەكتەپ-گيمنازيانىڭ كوركەم ەڭبەك ءپانىنىڭ مۇعالىمى، ۇلتتىق ديزاين اكادەمياسىنىڭ اكادەميگى ءلاززات اتىباي باستاعان. ونىڭ باستاماسى كەيىن «ونەرمەن ورىلگەن قازاقستان: كيىزبەن جازىلعان تاريح» اتتى رەسپۋبليكالىق شىعارماشىلىق جوباعا ۇلاسقان.
29 قازاندا ءال-فارابي اتىنداعى وقۋشىلار سارايىندا وتكەن تانىستىرىلىمدا قازاقستاننىڭ ءار وڭىرىنەن كەلگەن ۇستازدار مەن شەبەرلەردىڭ جۇمىستارى ۇسىنىلدى. ۇيىمداستىرۋشىلاردىڭ مالىمەتىنشە، كورمەگە قويىلعان كارتينالاردىڭ جالپى سانى 750-دەن اسقان. ال حالىقارالىق رەكوردقا 500 تۋىندى ۇسىنىلعان.
جۇمىستاردا قازاق دالاسىنىڭ تابيعاتى، تاريحي ورىندار، ۇلتتىق ويۋ-ورنەكتەر مەن حالىقتىڭ تۇرمىس-تىرشىلىگى بەينەلەنگەن.
جوبانىڭ ەرەكشە تۋىندىلارىنىڭ ءبىرى – كولەمى 7×4 مەتر بولاتىن قازاقستان كارتاسى. ونى ءلاززات اتىباي شاكىرتتەرىمەن بىرگە بەس اي بويى دايىنداعان. كارتانى جاساۋعا 10–15 كەلى ءجۇن جۇمسالىپ، دايىن بۇيىمنىڭ سالماعى 25–30 كەلىگە جەتكەن.
ايتا كەتەيىك، Global Best of Records ۇيىمىنىڭ سەرتيفيكاتى گيننەستىڭ رەكوردتار كىتابىنا قاتىسى جوق جانە ۇيىمنىڭ جەكە تىركەۋ جۇيەسىنە جاتادى. ۇيىمنىڭ ورتالىعى بىرىككەن اراب امىرلىكتەرىنىڭ شارجا قالاسىندا ورنالاسقان.
جوبا ۇلتتىق قولونەردى جاڭعىرتىپ، كيىز باسۋ ءداستۇرىن جاس ۇرپاققا ۇيرەتۋگە باعىتتالعان. سونىمەن قاتار ۇستازدار مەن وقۋشىلاردىڭ بىرلەسكەن ەڭبەگى ارقىلى قازاق مادەني مۇراسىن حالىقارالىق دەڭگەيدە تانىتۋعا مۇمكىندىك بەردى.
