قازاقستان پرەزيدەنتى قاسىم-جومارت توقاەۆ تۇركى مەملەكەتتەرى ۇيىمىنىڭ 13-ءسامميتىنىڭ اشىلۋ راسىمىنە قاتىستى، دەپ حابارلايدى "ادىرنا" ۇلتتىق پورتالى.
ءىس-شارا تۇركيا استاناسى انكاراداعى «كۋليە» سارايىندا ءوتتى. مەملەكەت باسشىسىن تۇركيانىڭ ۆيتسە-پرەزيدەنتى دجەۆدەت يىلماز قارسى الدى.
سامميت اياسىندا قاسىم-جومارت توقاەۆ ۇيىمعا مۇشە مەملەكەتتەردىڭ باسشىلارىمەن بىرگە انكاراداعى «بەشتەپە» ساياباعىندا ورنالاسقان تۇركى الەمى اللەياسىنىڭ اشىلۋ راسىمىنە قاتىستى.
اتالعان اۋماقتا تۇركيا، ازەربايجان، قازاقستان، قىرعىزستان، وزبەكستان جانە تۇرىكمەنستاننىڭ ۇلتتىق پاۆيلوندارى ورنالاسقان. ولاردىڭ ەكسپوزيتسيالارىندا تۇركى حالىقتارىنىڭ مادەنيەتى، رۋحاني مۇراسى مەن ىنتىماقتاستىعى تانىستىرىلعان.
قازاقستان پاۆيلونىندا قازاقتىڭ ءداستۇرلى كيىز ءۇيى ۇسىنىلدى. ول ۇلى دالا رۋحى مەن تۇركى حالىقتارىنىڭ ورتاق تاريحي تامىرىن بەينەلەيدى. مەملەكەت باسشىلارىنا كيىز ءۇيدىڭ بەزەندىرىلۋى ارقىلى ساقتار مۇراسى، حالقىمىزدىڭ تابيعاتپەن ۇيلەسىمدى ءومىر سالتى جانە قازىرگى قازاقستاننىڭ كەلبەتى تانىستىرىلدى.
سونداي-اق مارتەبەلى مەيماندار قازاق حالقىنىڭ ءداستۇرلى ساياتشىلىق ونەرىن بەينەلەيتىن «ساق اڭشىسى» مۇسىندىك كومپوزيتسياسىمەن تانىستى. بۇدان بولەك، كونە تۇركى جازبا مادەنيەتىنىڭ ماڭىزدى مۇراسى سانالاتىن ورحون ەسكەرتكىشتەرى كورسەتىلدى.
تۇركى مەملەكەتتەرى ۇيىمىنىڭ 13-ءسامميتى تۇركيا پرەزيدەنتى رەجەپ تايپ ەردوعاننىڭ توراعالىعىمەن وتەدى. بيىلعى جيىن «تۇركى عاسىرى: تىلدە، پىكىردە جانە ىستە بىرلىك» تاقىرىبىنا ارنالعان.
سامميت بارىسىندا ساياسات، ساۋدا، ەنەرگەتيكا جانە ورتا ءدالىزدى دامىتۋ ماسەلەلەرىن قامتيتىن باعىتتار بويىنشا ستراتەگيالىق شەشىمدەر قابىلداۋ كوزدەلگەن. سونىمەن قاتار تۇركى مەملەكەتتەرى اراسىنداعى ىنتىماقتاستىقتى نىعايتۋ جانە وڭىرلىك ءارى حالىقارالىق ماسەلەلەر بويىنشا ءوزارا ءىس-قيمىلدى دامىتۋ ماسەلەلەرى قاراستىرىلادى.
ايتا كەتەيىك، قاسىم-جومارت توقاەۆ تۇركياعا رەسمي ساپارمەن باردى. ساپار اياسىندا ونى انكاراداعى پرەزيدەنت سارايىندا سالتاناتتى قارسى الۋ ءراسىمى ءوتىپ، قازاقستان پرەزيدەنتى مەن تۇركيا باسشىسى رەجەپ تايپ ەردوعان كەلىسسوز جۇرگىزدى.
