سولتۇستىك كورەيا 29 قازان كۇنى تاڭەرتەڭ جاپون تەڭىزىنە قاراي قىسقا قاشىقتىققا ۇشاتىن 10-عا جۋىق بالليستيكالىق زىمىران ۇشىردى. بۇل تۋرالى KBS World جازدى، دەپ حابارلايدى «ادىرنا» ءتىلشىسى.
وڭتۇستىك كورەيا اسكەري كۇشتەرىنىڭ مالىمەتىنشە، زىمىراندار كحدر-دىڭ شىعىس جاعالاۋىنداعى ۆونسان قالاسى ماڭىنان جەرگىلىكتى ۋاقىت بويىنشا ساعات 12:30-دا ( استانا ۋاقىتىمەن 08:30-دا – رەد.) ۇشىرىلعان. قازىر ولاردىڭ ۇشۋ قاشىقتىعى مەن بيىكتىگى ناقتىلانىپ جاتىر.
سەۋلدە باقىلاۋ شارالارى كۇشەيتىلگەنى جانە جاڭا زىمىران ۇشىرۋ ارەكەتتەرىنە دايىندىق جۇرگىزىلىپ جاتقانى مالىمدەلدى. وڭتۇستىك كورەيا اسكەري كۇشتەرى زىمىراندار تۋرالى اقپاراتتى اقش جانە جاپونيامەن ءبولىسىپ وتىر.
زىمىران ۇشىرىلعانى تۋرالى جاپونيانىڭ قورعانىس مينيسترلىگى دە حابارلاعان. ۆەدومستۆونىڭ مالىمەتىنشە، بالليستيكالىق زىمىران بولۋى مۇمكىن نىسان ەلدىڭ ايرىقشا ەكونوميكالىق ايماعىنان تىس تەڭىزگە قۇلاعان.
جىل باسىنان بەرى سولتۇستىك كورەيا بالليستيكالىق زىمىرانداردى 17-رەت ۇشىرىپ وتىر. بۇعان دەيىنگى سىناق 12 قازاندا وتكەن. سول كەزدە زىمىرانداردىڭ ءبىر بولىگى 900 شاقىرىمنان استام قاشىقتىقتى ەڭسەرگەن. كەيىن پحەنيان تاكتيكالىق بالليستيكالىق زىمىران سىناقتان وتكىزىلگەنىن مالىمدەگەن.
