Ǧ.Qūrmanǧaliev atyndaǧy oblystyq akademiialyq filarmoniianyŋ kameralyq zalynda Avtojol salasy jäne avtomobil kölıgı qyzmetkerlerınıŋ künıne arnalǧan saltanatty jiyn men konsert öttı. Oǧan aimaq basşysy Nariman Töreǧaliev qatysyp, avtojolşylardy käsıbi merekemen qūttyqtady.
Oblys äkımı Memleket basşysy Qasym-Jomart Toqaevtyŋ bügıngı «Jaŋa tarihi kezeŋdegı Qazaqstannyŋ özektı mındetterı» atty Qazaqstan halqyna Joldauynda kölık infraqūrylymyn damytuǧa erekşe nazar audarǧanyn atap öttı.
– Prezidentımız Joldauda: «Bız Qazaqstannyŋ barlyq aimaǧyn bailanystyratyn, iaǧni, elımızdıŋ tranzittık äleuetın küşeitetın zamanaui, öte damyǧan temırjol jäne kölık joldarynyŋ tūtas jelısın qūruymyz kerek. Būl – strategiialyq mındet», – dep atap körsettı. Būl mındettı jüzege asyruda jolşylar men kölık salasy qyzmetkerlerıne ülken jauapkerşılık jükteledı. Sızderdıŋ kündelıktı eŋbekterıŋız öŋırler arasyndaǧy bailanysty nyǧaityp, el ekonomikasynyŋ damuyna tıkelei yqpal etedı, – dedı Nariman Töreǧaliev.
Öŋırde jol infraqūrylymyn damytu baǧytynda auqymdy jūmystar atqaryluda. 2023–2026 jyldary jalpy qūny 258 mlrd teŋgege 1,5 myŋ şaqyrymnan astam avtomobil jolyn salu, qaita jaŋǧyrtu jäne jöndeu jūmystary qamtyldy.
Qazırgı taŋda oblystaǧy avtomobil joldarynyŋ jalpy ūzyndyǧy 6 myŋ şaqyrymnan asady. Onyŋ 1 349 şaqyrymy – respublikalyq, 4 714 şaqyrymy – jergılıktı maŋyzy bar joldar. Respublikalyq joldardyŋ 98 paiyzy, jergılıktı joldardyŋ 60 paiyzy normativtık talaptarǧa säikes keledı.
Saltanatty jiynda avtojol jäne avtomobil kölıgı salasynyŋ damuyna üles qosqan qyzmetkerler men ardagerlerge Qazaqstan Respublikasy Kölık ministrlıgınıŋ salalyq marapattary, qūrmet gramotalary men alǧys hattary tabystaldy.
