«سامۇرىق-قازىنا» اق باسقارماسىنىڭ شەشىمىمەن قايرات ماقسۇتوۆ «سامۇرىق-ەنەرگو» اق باسقارما توراعاسى قىزمەتىنەن بوساتىلدى. بۇل تۋرالى بۇگىن، 28 قازاندا ۇكىمەتتىڭ ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
«بۇل شەشىم كومپانيانىڭ ستراتەگيالىق ينۆەستيتسيالىق جوبالارىن جۇزەگە اسىرۋ قارقىنىنىڭ باياۋ جۇرۋىنە، سونداي-اق جاڭا گەنەراتسيالاۋ قۋاتتارىن سالۋ مەن پايدالانۋعا بەرۋ مەرزىمدەرىنىڭ ساقتالۋىنا باقىلاۋدىڭ جەتكىلىكسىز بولۋىنا بايلانىستى قابىلداندى»،– دەلىنگەن حابارلامادا.
قايرات بەرىكۇلى 1970 جىلى ومىرگە كەلگەن. 1991 جىلى قازتۇتىنۋوداعى قاراعاندى كووپەراتيۆتىك ينستيتۋتىن، 2019 جىلى الماتى ەنەرگەتيكا جانە كوممۋنيكاتسيا ۋنيۆەرسيتەتىن بىتىرگەن.
1997-1999 جىلدارى ەركىن ەكونوميكالىق ايماقتىڭ اكىمشىلىك كەڭەسى توراعاسىنىڭ ورىنباسارى، قاراجال قالاسى اكىمىنىڭ ورىنباسارى، 1999-2004 جىلدارى الفا-بانك» اق ەب قاراعاندى فيليالى ديرەكتورىنىڭ ورىنباسارى، ديرەكتورى، 2004-2008 جىلدارى Gephaestus تاۋ-كەن ونەركاسىبى حولدينگىنىڭ ەكونوميكا جونىندەگى ۆيتسە-پرەزيدەنتى، 2008-2009 جىلدارى ەۋرازيالىق حولدينگ كومپانياسىنىڭ باسقارۋشى ديرەكتورى، 2009-2013 جىلدارى «سامۇرىق-ەنەرگو» اق باسقارما توراعاسىنىڭ قارجى جانە ەكونوميكا جونىندەگى ورىنباسارى، 2012-2013 جىلدارى «سامۇرىق-ەنەرگو» اق قارجى جانە ەكونوميكا جونىندەگى باسقارۋشى ديرەكتورى، 2012-2013 جىلدارى «سامۇرىق-ەنەرگو» اق كورپوراتيۆتىك باسقارۋ جونىندەگى باسقارۋشى ديرەكتورى، 2013-2016 جىلدارى «سامۇرىق-ەنەرگو» اق باسقارما توراعاسىنىڭ ورىنباسارى، 2016-2018 جىلدارى «سامۇرىق-ەنەرگو» اق ەكونوميكا جانە قارجى جونىندەگى باسقارۋشى ديرەكتورى، 2018-2023 جىلدارى كوممەرتسيالىق قۇرىلىمداردىڭ باسشىسى بولعان.
ول «سامۇرىق-ەنەرگو» اق باسقارما توراعاسى لاۋازىمىنا 2023 جىلدىڭ ماۋسىم ايىندا تاعايىندالعان بولاتىن.
پرەزيدەنت توقاەۆ حالىققا ارناعان بۇگىنگى جولداۋىندا قازاقستاننىڭ ەنەرگەتيكالىق سەكتورىنداعى جاعدايدى سىناعان بولاتىن. ەل باسشىسى قازاقستاننىڭ قىستا كورشىلەرىنەن قىمبات ەلەكتر ەنەرگياسىن ساتىپ الىپ، جازدا ونى الدەقايدا تومەن باعامەن قايتارۋعا ءماجبۇر ەكەنىن ايتقان. پرەزيدەنت سونىمەن قاتار تۇركىستان، قىزىلوردا، الماتى جانە ەكىباستۇز قالالارىندا جاڭا ەلەكتر ستانتسيالارىن ىسكە قوسۋ مەرزىمدەرىن وتكىزىپ العانىنا شۇيلىككەن. پرەزيدەنت قازاقستان جىلىنا 123 ميلليارد كۆت/ساع ەلەكتر ەنەرگياسىن وندىرەتىنىن، بىراق بۇل ەكونوميكالىق دامۋ مەن تسيفرلاندىرۋ ءۇشىن وتە جەتكىلىكسىز ەكەنىنە دە نازار اۋدارعان.
