جاپونيانىڭ ايتي-ناگويا قالاسىندا وتكەن V ازيا پارا ويىندارىندا قازاقستان قۇراماسى 50 مەدال يەلەندى، دەپ حابارلايدى “ادىرنا” ۇلتتىق پورتالى.
ونىڭ ىشىندە 12 التىن، 16 كۇمىس جانە 22 قولا جۇلدە بار. جالپىكوماندالىق ەسەپتە قازاقستان توعىزىنشى ورىنعا تۇراقتادى.
بيىل جارىستا قازاقستان نامىسىن 12 سپورت تۇرىنەن 150 سپورتشى قورعادى. وتانداستارىمىز پارادزيۋدو، پاراۆەلوسپورت، ءپاراجۇزۋ، پاراپاۋەرليفتينگ، جەڭىل اتلەتيكا، ساداق اتۋ، نىسانا كوزدەۋ، ۇستەل تەننيسى، پاراتحەكۆوندو، بوچچا، ارباداعى تەننيس جانە وتىرىپ وينايتىن ۆولەيبولدان باق سىنادى.
قازاقستان قۇراماسى ەڭ كوپ جۇلدەنى پارادزيۋدودان جەڭىپ الدى. سپورتشىلار بەس التىن، ءبىر كۇمىس جانە جەتى قولا مەدال يەلەنىپ، وسى سپورت تۇرىنەن جالپىكوماندالىق ەسەپتە ءبىرىنشى ورىنعا شىقتى.
ال پاراتحەكۆوندو، بوچچا جانە ارباداعى تەننيستەن قازاقستاندىق سپورتشىلار جۇلدەگەرلەر قاتارىنان كورىنە المادى.
دەنە مۇمكىندىگى شەكتەۋلى ادامدارعا ارنالعان سپورتتىق دايارلىق ورتالىعىنىڭ ديرەكتورى بولاتبەك دوكەتاەۆتىڭ ايتۋىنشا، بيىلعى ويىندار قازاقستان قۇراماسى ءۇشىن ناتيجەلى بولدى.
«2023 جىلى حانچجوۋدا وتكەن IV ازيا پارا ويىندارىندا سپورتشىلارىمىز سەگىز التىن، 12 كۇمىس جانە 21 قولا مەدال جەڭىپ العان ەدى. بيىل قۇرامامىز 12 التىن، 16 كۇمىس جانە 22 قولا جۇلدەگە يە بولدى. وسىلايشا، الدىڭعى ويىندارمەن سالىستىرعاندا التىن مەدال سانىن تورتكە، ال جالپى جۇلدە سانىن توعىزعا ارتتىردىق»، – دەدى ول.
سونىمەن قاتار قازاقستان قۇراماسى ازيا پارا ويىندارىنىڭ تاريحىندا العاش رەت ۇستەل تەننيسى مەن ساداق اتۋدان مەدال جەڭىپ الدى.
بۇدان بولەك، قازاقستاندىق سپورتشىلار بىرنەشە رەكورد جاڭارتتى. ەركىن عابباسوۆ پەن داۆيد دەگتيارەۆ پارا ازيا ويىندارىنىڭ رەكوردتارىن جاڭارتسا، دياس كەنجەبەك پەن ايسۇلۋ سۇلەيمەنوۆا وزدەرىنىڭ سپورتتىق سىنىپتارىندا ازيا رەكوردتارىن ورناتتى.
بولاتبەك دوكەتاەۆ بۇل جەتىستىكتەرگە پاراسپورتتى مەملەكەتتىك دەڭگەيدە قولداۋ، سپورتشىلاردىڭ تاباندىلىعى مەن قاجىرلى ەڭبەگى، جاتتىقتىرۋشىلاردىڭ كاسىبي شەبەرلىگى جانە جۇيەلى دايىندىقتىڭ ارقاسىندا قول جەتكىزىلگەنىن اتاپ ءوتتى.
