اقمولا وبلىسىندا رەسپۋبليكا كۇنىنە وراي اۋىل شارۋاشىلىعى جارمەڭكەسى ۇيىمداستىرىلىپ، تۇرعىندارعا 250 توننادان استام ءونىم ۇسىنىلدى. جەرگىلىكتى تاۋار وندىرۋشىلەر تۇرعىندارعا ازىق-تۇلىك ونىمدەرىن نارىقتاعى باعادان 10–15 پايىزعا تومەن باعامەن ۇسىندى.
مەرەكەلىك جارمەڭكەگە اقمولا وبلىسىنىڭ اكىمى مارات احمەتجانوۆ قاتىسىپ، ساۋدا ورىندارىن ارالادى. ءوڭىر باسشىسى جەرگىلىكتى تاۋار وندىرۋشىلەرمەن كەزدەسىپ، ونىمدەردىڭ ساپاسى مەن باعاسىنا نازار اۋداردى. سونداي-اق تۇرعىندارمەن اڭگىمەلەسىپ، ولاردى رەسپۋبليكا كۇنىمەن قۇتتىقتادى.
جارمەڭكەگە ارشالى، ەگىندىكول، شورتاندى، بۇلاندى، قورعالجىن، ەسىل، ساندىقتاۋ جانە ءبىرجان سال اۋداندارىنىڭ، سونداي-اق قوسشى جانە ستەپنوگورسك قالالارىنىڭ وكىلدەرى قاتىستى. ساۋدا جاساۋعا ارنالعان 50 پاۆيلوندا 100 ورىن جابدىقتالدى.
“شاراعا وڭىردەگى 25 اۋىل شارۋاشىلىعى تاۋارىن ءوندىرۋشى قاتىسىپ، ءونىمنىڭ 30-دان استام ءتۇرىن ساتىلىمعا شىعاردى. ساتىپ الۋشىلارعا ەت جانە شۇجىق ونىمدەرى، ءسۇت پەن ءسۇت ونىمدەرى، جۇمىرتقا، ۇن، كارتوپ، كوكونىس، وسىمدىك مايى جانە باسقا دا كۇندەلىكتى قاجەتتى ازىق-تۇلىك ۇسىنىلدى.”، دەيدى وبلىستىق اۋىل شارۋاشىلىعى جانە جەر قاتىناستارى باسقارماسى وكىلدەرى.
الەۋمەتتىك ماڭىزى بار ازىق-تۇلىك ونىمدەرىن قولجەتىمدى باعامەن ۇسىنۋعا ەرەكشە ءمان بەرىلدى. «سپك Kokshe» ۇك» اق-نىڭ تۇراقتاندىرۋ قورى ارقىلى سيىر ەتى، ءبىرىنشى سۇرىپتى ۇن، قانت، كۇرىش، تۇز، كۇنباعىس مايى، ماكارون ونىمدەرى، كارتوپ جانە ءسابىز ساتىلىمعا شىعارىلدى.
قورعالجىن اۋدانىنىڭ ارىقتى اۋىلدىق وكرۋگىنەن كەلگەن كاسىپكەر گۇلميرا ءماجيتوۆا جارمەڭكەگە ەكى جىلقى مەن بەس ءىرى قارانىڭ ەتىن اكەلدى. ونىڭ ايتۋىنشا، ونىمگە دەگەن سۇرانىس جوعارى بولعان.
«بۇگىنگى ساۋدامىز ءساتتى ءوتتى. تۇتىنۋشىلار ونىمدەرىمىزگە، اسىرەسە ەتكە جوعارى باعا بەردى. بارشاڭىزدى رەسپۋبليكا كۇنىمەن شىن جۇرەكتەن قۇتتىقتايمىن! ەلىمىز تىنىش، وتانىمىز امان بولسىن. حالقىمىز ءاردايىم ىنتىماق پەن بىرلىكتە ءومىر ءسۇرىپ، مەملەكەتىمىز دامي بەرسىن»، – دەدى كاسىپكەر.
قالا تۇرعىنى گۇلميرا بايشەۆا دا جارمەڭكەدەن قاجەتتى ازىق-تۇلىگىن ساتىپ الدى. ول كارتوپ، قىزىلشا، ءسابىز، بالىق جانە جۇمىرتقا سياقتى ونىمدەردى ءتيىمدى باعامەن الۋعا مۇمكىندىك بولعانىن ايتتى.
«وسىنداي جارمەڭكەنىڭ ۇيىمداستىرىلعانىنا قۋانىشتىمىن. وسى ماڭدا تۇراتىندىقتان، قاجەتتى ازىق-تۇلىكتى الىسقا بارماي-اق ساتىپ الدىم. ساۋدا جاساپ قانا قويماي، مەرەكەلىك كونتسەرتتى تاماشالاپ، جاقسى كوڭىل كۇيگە بولەندىك. مۇنداي جارمەڭكەلەر ءجيى ۇيىمداستىرىلسا ەكەن. بارشا وتانداستارىما زور دەنساۋلىق پەن تابىس تىلەيمىن! رەسپۋبليكا كۇنى قۇتتى بولسىن!» – دەدى قالا تۇرعىنى.
مەرەكەلىك جارمەڭكە تۇرعىندارعا قاجەتتى ازىق-تۇلىكتى قولايلى باعامەن ساتىپ الۋعا مۇمكىندىك بەرىپ قانا قويماي، جەرگىلىكتى وندىرۋشىلەر مەن تۇتىنۋشىلار اراسىنداعى بايلانىستى نىعايتۋعا ىقپال ەتتى.
