مەملەكەت باسشىسى قاسىم-جومارت توقاەۆ رەسپۋبليكا كۇنىنە ارنالعان سالتاناتتى جيىندا مادەنيەت، ءبىلىم جانە سپورت سالالارىندا ەڭبەك سىڭىرگەن بىرقاتار ازاماتقا مەملەكەتتىك ناگرادالار تابىستالاتىنىن ايتتى. بۇل تۋرالى اقوردا جازدى، دەپ حابارلايدى "ادىرنا".
پرەزيدەنت بەلگىلى سازگەر، ۇستاز التىنبەك قورازباەۆتىڭ قازاق ونەرىنە قوسقان ۇلەسىن اتاپ ءوتتى.
"وسى مەرەكەلىك جيىنعا ءتول مادەنيەتىمىزدىڭ كورنەكتى وكىلى، بەلگىلى سازگەر، ۇستاز التىنبەك قورازباەۆ قاتىسىپ وتىر. ونىڭ اندەرى بىرنەشە بۋىننىڭ جۇرەگىنە جول تاۋىپ، قازاق ونەرىنىڭ التىن قورىنا قوسىلدى. مەن بۇگىن التىنبەك قورازباەۆقا ەڭ جوعارى ماراپات – "وتان" وردەنىن تابىستايمىن", – دەدى قاسىم-جومارت توقاەۆ.
مەملەكەت باسشىسى داڭقتى الپينيست قازبەك ۋاليەۆتىڭ جەتىستىكتەرىنە دە توقتالدى.
"قازىر ارامىزدا داڭقتى الپينيست قازبەك ۋاليەۆ وتىر. ول دۇنيە ءجۇزىنىڭ ەڭ بيىك شىڭدارىن باعىندىرىپ، الەمدىك ءالپينيزمنىڭ اڭىزىنا اينالدى. مەن قازبەك شاكىمۇلىنىڭ ەرەن ەڭبەگىن ەسكەرە وتىرىپ، ونى ءىى دارەجەلى "بارىس" وردەنىمەن ماراپاتتاۋدى ۇيعاردىم", – دەدى پرەزيدەنت.
