بۇگىن، 19 قازاندا پرەزيدەنت قاسىم-جومارت توقاەۆ قۇتقارۋ سالاسى قىزمەتكەرلەرىن مەملەكەتتىك ناگرادالارمەن ماراپاتتادى، دەپ حابارلايدى «ادىرنا» ءتىلشىسى.
«قۇتقارۋشى» ءسوزىنىڭ ماعىناسى – وتە كەڭ ءارى تەرەڭ. «قۇتقارۋ» – ءاردايىم يگى ءىس جاساۋمەن، جاقسىلىق ىستەۋمەن بايلانىستى ۇعىم. ادام ومىرىنە اراشا ءتۇسۋ، ازاماتتاردى قاۋىپ-قاتەردەن قورعاۋ، وقىس جاعدايعا تاپ بولعان ادامدارعا قول ۇشىن سوزۋ، ءتىپتى، ولاردىڭ قورقىنىشىن باسىپ، جۇباتۋ ءسوز ايتۋ – وسىنىڭ ءبارى دە ناعىز قۇتقارۋشىنىڭ بويىنان تابىلاتىن اسىل قاسيەتتەر. سوندىقتان حالقىمىز سىزدەردى، ياعني ەلىمىزدىڭ بارشا قۇتقارۋشى ماماندارىن بەيبىت كۇننىڭ باتىرلارى دەپ اتايدى. بۇل – شىن مانىندە ادىلەتتى باعا. ارينە، قۇتقارۋشى بولۋ كوپتىڭ العىسىنا بولەيتىن ابىرويلى جانە مارتەبەلى قىزمەت ەكەنى ءسوزسىز. الايدا ازاماتتىق قورعانىس سالاسىندا ادال ەڭبەك ەتۋ ءبارىنىڭ قولىنان كەلە بەرمەيتىن شارۋا ەكەنىن دە ۇمىتپاۋىمىز قاجەت. باتىل، قايسار، شيراق ءارى وجەت بولۋ – ءوز الدىنا وتە ماڭىزدى تالاپ ەكەنى داۋسىز. بىراق قۇتقارۋشى ەڭ الدىمەن ەلگە جانى اشيتىن وتانشىل ازامات جانە بىلىكتى مامان بولۋعا ءتيىس. وسىنداي كۇردەلى جۇمىستى رۋحى مىقتى، جاۋاپكەرشىلىگى جوعارى، جۇرەكتى ادامدار عانا تاڭدايدى»،– دەدى پرەزيدەنت.
قاسىم-جومارت توقاەۆ توتەنشە جاعداي سالاسىنىڭ قىزمەتكەرلەرى ەشقانداي قاۋىپ-قاتەردەن تايسالمايتىن، سىن-ساعاتتا جەدەل شەشىم قابىلداي الاتىن، ارنايى دايارلىقتان وتكەن ناعىز كاسىبي ماماندار دەپ ەسەپتەيتىنىن ايتتى.
«قۇتقارۋشىلاردىڭ ەڭبەگى قاشاندا ەلىمىزدىڭ كوز الدىندا. سىزدەر كۇن سايىن تاۋەكەلگە بارىپ، كاسىبي مىندەت پەن جاۋاپكەرشىلىكتى بارىنەن بيىك قوياسىزدار. باسقاشا ايتقاندا، وت پەن سۋدىڭ ورتاسىندا جۇرەسىزدەر. توتەنشە جاعدايعا تۇسكەن ادامدارعا جاردەم بەرىپ، ولاردى قيىندىقتان قۇتقارۋ ءۇشىن قاجىماي قىزمەت ەتەسىزدەر. قۇتقارۋشىلار كەز كەلگەن توتەنشە جاعدايدا ءبىرىنشى بولىپ كومەككە ۇمتىلادى. ولار وزگەنىڭ ءومىرىن ساقتاۋ ءۇشىن، ءوز ءومىرىن قاتەرگە تىگەدى. بۇل – ناعىز قۇتقارۋشىعا ءتان باتىرلىق. مەن مەملەكەت باسشىسى رەتىندە سىزدەردىڭ ەرەن ەڭبەكتەرىڭىز قوعامىمىزدىڭ ايرىقشا سىي-قۇرمەتىنە لايىقتى دەپ سانايمىن»،– دەدى ول.
سونداي-اق پرەزيدەنت قۇتقارۋشىلارعا ماراپات تابىستادى. ءىى دارەجەلى «داڭق» وردەنىمەن ماڭعىستاۋ وبلىسى توتەنشە جاعدايلار دەپارتامەنتىنىڭ باستىعى قۋانار بازارباەۆ پەن استانا قالاسى توتەنشە جاعدايلار دەپارتامەنتىنىڭ باسشىسى مارات كۇلدىكوۆ ماراپاتتالدى.
باۋىرجان مومىشۇلى اتىنداعى ءىى دارەجەلى «ايبىن» وردەنى الماتى قالاسى توتەنشە جاعدايلار دەپارتامەنتى باستىعىنىڭ ءبىرىنشى ورىنباسارى دانيار انريگە جانە اقمولا وبلىسىنداعى ازاماتتىق قورعاۋ اكادەمياسى ءبولىمىنىڭ باستىعى الەكسەي تسۋركانعا تابىستالدى.
ال «قۇرمەت» وردەنىنە ءۇش ازامات لايىق دەپ تانىلدى. ولاردىڭ قاتارىندا «كاسىبي اسكەريلەندىرىلگەن اۆاريالىق-قۇتقارۋ قىزمەتتەرىنىڭ رەسپۋبليكالىق ورتالىق شتابى» جشس باس ديرەكتورى تيميرلان دزاۋروۆ، توتەنشە جاعدايلار مينيسترلىگى دەپارتامەنتى ديرەكتورىنىڭ ورىنباسارى ەرىك ەسماحانوۆ جانە مينيسترلىكتىڭ شىعىس قازاقستان وبلىسى بويىنشا دەپارتامەنتىنىڭ باس مامانى ەلەنا نارزيەۆا بار.
«ەرلىگى ءۇشىن» مەدالى ءتورت ازاماتقا بەرىلدى. ماراپات يەلەرىنىڭ قاتارىندا «بارىس» رەسپۋبليكالىق قۇتقارۋ قىزمەتىنىڭ باس قۇتقارۋشىسى دارحان بايدەكەنوۆ، قىزىلوردا قالاسىنداعى №6 ءورت ءسوندىرۋ ءبولىمىنىڭ اعا ءورت ءسوندىرۋشى-قۇتقارۋشىسى نۇرسۇلتان جالعاسوۆ، الماتى قالاسىنداعى مونيتورينگ جانە جەدەل ارەكەت ەتۋ ورتالىعىنىڭ قۇتقارۋشىسى دارحان رىسباەۆ جانە «بۋرۋنداياۆيا» اۋە كومپانياسىنىڭ اۋە كەمەسىنىڭ كومانديرى الەكساندر چەبوتكين بار.
سونىمەن قاتار «ەرەن ەڭبەگى ءۇشىن» مەدالى قىزىلوردا وبلىسىنداعى «وڭتالاپ» شارۋا قوجالىعىنىڭ ديرەكتورى ءابدىحاميت ارالباەۆ پەن اباي وبلىسىنداعى «اعايىندى» شارۋا قوجالىعىنىڭ ديرەكتورى جانات يبراگيموۆكە تابىستالدى.
