جەتىسۋ وبلىسىندا جاڭارتىلاتىن ەنەرگەتيكانى دامىتۋ جۇمىستارى جالعاسۋدا. رەسپۋبليكا كۇنى قارساڭىندا وڭىردە قۋاتى 40 مۆت بولاتىن كۇن ەلەكتر ستانتسياسى ىسكە قوسىلدى. جاڭا نىسان پايدالانۋعا بەرىلگەن سوڭ وبلىستاعى جاڭارتىلاتىن ەنەرگيا كوزدەرى نىساندارىنىڭ سانى 20-عا جەتتى. ءوڭىردىڭ ەلەكتر ەنەرگەتيكاسىنىڭ جالپى بەلگىلەنگەن قۋاتى 370 مۆت بولسا، ونىڭ 291 مۆت-ى جاڭارتىلاتىن ەنەرگيا كوزدەرى نىساندارىنا تيەسىلى، دەپ حابارلايدى جەتىسۋ وبلىسى اكىمىنىڭ ءباسپاسوز قىزمەتى.
پانفيلوۆ اۋدانىندا «جاركەنت-2» كۇن ەلەكتر ستانتسياسى پايدالانۋعا بەرىلدى. قۇنى 5,8 ملرد تەڭگەنى قۇرايتىن اۋقىمدى ينۆەستيتسيالىق جوبا ءوڭىردىڭ ەنەرگەتيكالىق تاۋەلسىزدىگىن نىعايتۋعا، ەكولوگيالىق جۇكتەمەنى ازايتۋعا، سونداي-اق قورعاس اگلومەراتسياسىنداعى تۇرعىن ۇيلەر مەن قارقىندى دامىپ كەلە جاتقان كاسىپورىنداردى تۇراقتى ءارى تازا ەلەكتر ەنەرگياسىمەن قامتاماسىز ەتۋگە باعىتتالعان. سالتاناتتى اشىلۋ راسىمىنە وبلىس اكىمىنىڭ ورىنباسارى اسەت قاناعاتوۆ قاتىستى.
– جەتىسۋ وبلىسىنىڭ تابيعي رەسۋرستارى جاڭارتىلاتىن ەنەرگيا كوزدەرىن دامىتۋعا زور مۇمكىندىك بەرەدى. وسىعان بايلانىستى وبلىس اكىمىنىڭ باسشىلىعىمەن وڭىردە جۇيەلى جۇمىس جۇرگىزىلۋدە. بۇگىندە وبلىستا 15 گيدروەلەكتر ستانتسياسى، قۋاتى ءارتۇرلى 2 جەل ەلەكتر ستانتسياسى جانە وسى نىساننى قوسا العاندا 3 كۇن ەلەكتر ستانتسياسى جۇمىس ىستەيدى. بۇگىنگى كۇن ەلەكتر ستانتسياسىنىڭ ىسكە قوسىلۋى گەنەراتسيالاۋ قۋاتىن ارتتىرىپ، ءوڭىردىڭ ەلەكترمەن جابدىقتاۋ سەنىمدىلىگىن نىعايتا الادى، - دەدى ا. قاناعاتوۆ.
جوبا تۋرالى تولىعىراق «Jetisu Terra Power» جشس ديرەكتورى دەنيس تسارەۆ بايانداپ بەردى.
- ءبىز قۋاتى 20 مۆت بولاتىن «جاركەنت-2» كۇن ەلەكتر ستانتسياسىن ىسكە قوستىق. بۇل ستانتسيا جىلىنا 33 ملن كۆت-قا دەيىن تازا ەلەكتر ەنەرگياسىن وندىرە الادى. بۇل جاركەنت قالاسى مەن وعان جاقىن ورنالاسقان ەلدى مەكەندەردى ەلەكتر ەنەرگياسىمەن قامتاماسىز ەتۋگە جەتكىلىكتى. بۇل – وڭىردە جۇزەگە اسىرعان ەكىنشى جوبامىز. ناۋرىز ايىندا وسىنداي كورسەتكىشتەرى بار كۇن ەلەكتر ستانتسياسىن ىسكە قوسقان بولاتىنبىز. وسىلايشا، ەكى ستانتسيانىڭ جالپى قۋاتى 40 مۆت-قا جەتتى، – دەدى ول.
- ەلەكتر ەنەرگياسىنىڭ جەتىسپەۋشىلىگىنىڭ الدىن الۋ ءۇشىن الدىمىزدا جاسىل ەنەرگەتيكانى دامىتۋ مىنەدى تۇر. وسى مىندەتكە وراي اۋماعى 50 گەكتار جەرگە 62 مىڭ كۇن پانەلى قويىلدى. ءار پانەلدىڭ قۋاتى 650-680 ۆت. تاڭعى 5-تەن كەشكە دەيىن ەنەرگيا وندىرەدى. جالپى قۋاتى – 40 مۆت. ستانتسيادا 20 ادام جۇمىس ىستەيدى، - دەدى ستانتسيا ديرەكتورى سەرىكباي كوبەلەكوۆ.
جاڭارتىلاتىن ەنەرگەتيكانى دامىتۋ وڭىردەگى باسىم باعىتتاردىڭ ءبىرى بولىپ قالا بەرەدى. 2026-2028 جىلدارى جالپى قۋاتى 170 مۆت-تان اساتىن تاعى 9 جاڭارتىلاتىن ەنەرگيا كوزدەرى نىسانىن پايدالانۋعا بەرۋ جوسپارلانعان.
