19 qazan – Qūtqaruşylar künı. Būl kün – tılsız jaumen küresıp, adam ömırın saqtap qalu üşın qauıpke bas tıgetın azamattardyŋ eŋbegın eske alatyn erekşe data. Alaida erlık tek arnaiy qyzmet ökılderınıŋ ıs-äreketımen şektelmeidı. Keide qarapaiym adamdar da qiyn sätte öz ömırın qauıpke tıgıp, jaqyndaryn ajaldan araşalap qalady.
Olardyŋ arasynda otbasyn qūtqarǧan äkeler, bauyryn qorǧaǧan balalar, şäkırtterı üşın janyn qiǧan ūstazdar men qarulastaryna kömektesken sarbazdar bar. Qazaqstanda osyndai erlıgımen el esınde qalǧan azamattar az emes. Olardyŋ oqiǧalary adam ömırınıŋ qadırın, jaqynǧa degen süiıspenşılık pen janqiiarlyqtyŋ mänın ūǧyndyrady.
OTBASYN ÖRTTEN QŪTQARYP, ÖZI QAZA TAPTY
2025 jylǧy 9 qazanda Pavlodar oblysy Tereŋköl audanynda qaiǧyly oqiǧa boldy. Jeke tūrǧyn üiden ört şyǧyp, jalyn aǧaş şatyr konstruksiialaryn şarpyǧan.
Ört söndıruşıler jetkenge deiın 1982 jyly tuǧan Nūrjan İsaev äielı men üş balasyn tereze arqyly syrtqa alyp şyqqan. Osylaişa ol otbasy müşelerınıŋ ömırın saqtap qaldy.
Alaida özı es-tüssız küide auruhanaǧa jetkızıldı. Därıgerler onyŋ ömırın saqtap qala almady.
Pavlodar oblystyq Tötenşe jaǧdailar departamentınıŋ mälımetınşe, örttıŋ aumaǧy 100 şarşy metrdı qūraǧan.
Bes adamnan tūratyn otbasynyŋ aman qaluy – äkenıŋ batyldyǧy men öz jaqyndary üşın jasaǧan janqiiarlyq äreketınıŋ nätijesı.
BAUYRYN QŪTQARAM DEP ÖZI SUǦA KETTI
2020 jylǧy 25 mausymda Jezqazǧan qalasynda qaiǧyly jaǧdai boldy. 14 jastaǧy jasöspırım suǧa batyp bara jatqan 13 jastaǧy äpkesın qūtqaru üşın suǧa tüsken.
Oqiǧa Jezqazǧan – Sätbaev tasjolynyŋ maŋynda bolǧan. Kommunaldyq apattan keiın paida bolǧan su jinalǧan şūŋqyrǧa qyz qūlap ketken. Mūny körgen aǧasy oilanbastan ony qūtqaruǧa ūmtylǧan.
Alaida jasöspırım öz küşın eseptei almai, suǧa batyp ketken. Balalardyŋ janaiqaiyn estıgen ötıp bara jatqan adamdar kömekke kelıp, qyzdy qūtqaryp qalǧan. Al balanyŋ denesı keiınırek sudan tabylǧan.
Oqiǧadan keiın qala äkımdıgı men polisiia tiıstı tekseru jürgızgen. Kuägerlerdıŋ aituynşa, su jinalǧan şūŋqyrdyŋ ainalasynda qorşau bolmaǧan.
Būl oqiǧa bauyryn qorǧau üşın janyn qiǧan balanyŋ erlıgımen qatar, adam ömırıne qauıp töndıretın aşyq su qoimalary men qarausyz qalǧan şūŋqyrlardyŋ qanşalyqty qauıptı ekenın de körsettı.
ŞÄKIRTTERI ÜŞIN ÖMIRIN QİǦAN JAS ŪSTAZ
2021 jylǧy 31 mamyrda Almaty qalasyndaǧy №199 gimnaziianyŋ 26 jastaǧy mūǧalımı Merei İbragimov Şaryn şatqalynda oquşyny qūtqaru kezınde qaza tapty.
Merei İbragimov körkemdık pänderden sabaq bergen. Pedagogikalyq eŋbek ötılı bes jyl bolǧan ūstazdy ärıptesterı men şäkırtterı jauapkerşılıgı joǧary, şyǧarmaşylyq tūlǧa retınde sipattaǧan.
Qaiǧyly oqiǧa kezınde mūǧalım balalarǧa kömektesıp, oquşyny qūtqaruǧa tyrysqan. Osy sätte onyŋ özı de ajal qūşty.
Almaty qalasynyŋ bılım basqarmasy Merei İbragimovtıŋ mektep ūjymynda erekşe qūrmetke ie bolǧanyn atap öttı. Ony oquşylary jaqsy köretın, ärdaiym ainalasyna jylulyq syilaityn ūstaz retınde eske aldy.
Jas pedagogtıŋ erlıgı – ūstazdyqtyŋ tek bılım berumen şektelmeitının, keide şäkırtınıŋ ömırı üşın jauapkerşılıktı öz moinyna aluǧa daiyn bolu ekenın körsetedı.
SOŊǦY SÄTKE DEIIN ÖZGELERDI QŪTQARDY
2022 jylǧy 9 tamyzda Almaty oblysyndaǧy äskeri oqu-jattyǧu poligonynda qatty dauyl soǧyp, sarbazdar ornalasqan şatyrly qalaşyqty qiratty. Oqu-jattyǧu ortalyǧynda 15 äskeri qyzmetşı bolǧan. Şkvaldy jel şatyrlardy ūşyryp, ainalany şaŋ basqan kezde sarbazdar qauıpsız jerge şyǧuǧa tyrysty. 19 jastaǧy qatardaǧy jauynger Almas Şahimov bırneşe qarulasynyŋ ömırın saqtap qaluǧa kömektestı. Ol sarbazdardy qatty jelden qorǧaityn jerge baǧyttap, özı özgelerdı qūtqaru üşın qaita oralǧan.
Almas äskeri qyzmetşılerdıŋ qauıpsız jerge şyǧuyna kömektesıp, şatyrdan eŋ soŋǧy bolyp şyqqan. Sol sätte jel şatyrdyŋ metall qaŋqasyn jūlyp äketıp, onyŋ basyna soqqy tigen.
Almas Şahimov auruhanaǧa jetkızılgenımen, därıgerler onyŋ ömırın saqtap qala almady.
Onyŋ qarulastary Almastyŋ äreketın erlık dep baǧalady. Ol özgelerdıŋ amandyǧyn öz ömırınen joǧary qoiǧan azamat retınde este qaldy.
Almas Kökşetau qalasynan äskerge şaqyrylǧan. Azamattyq qorǧanys kolledjınde ört qauıpsızdıgı mamandyǧyn oqyǧan jas jıgıttıŋ özı de adamdardy qūtqarudy maqsat etken.
Erlık – jaqynyŋnyŋ ömırın öz ömırıŋnen joǧary qoiu
Būl oqiǧalardyŋ ärqaisysy är kezeŋde, ärtürlı jaǧdaida bolǧanymen, olardy bırıktıretın ortaq qasiet bar. Ol – jaqyndarynyŋ ömırın saqtap qalu üşın qauıpke qaramastan äreket etu.
Bırı otqa oranǧan üiden äielı men balalaryn alyp şyqty. Ekınşısı suǧa batyp bara jatqan äpkesıne kömektesuge ūmtyldy. Taǧy bırı şäkırtın qūtqarsa, jas sarbaz qarulastarynyŋ amandyǧy üşın soŋǧy sätıne deiın kürestı.
Olardyŋ erlıgı – qoǧam üşın ülken önege. Sonymen bırge mūndai qaiǧyly oqiǧalar qauıpsızdık talaptaryn saqtau, qauıptı nysandardy qorşau, tötenşe jaǧdailardyŋ aldyn alu jäne adamdarǧa alǧaşqy kömek körsetu daǧdylaryn üiretudıŋ maŋyzyn eske salady. Olardyŋ esımderı men jasaǧan jaqsylyǧy ūmytylmaidy.
Gülbarşyn Nūrhan
«Adyrna» ūlttyq portaly
