فرانتسيا پرەزيدەنتى ەممانۋەل ماكرون ەلدە جاپپاي نارازىلىقتار بولىپ جاتقان تۇستا حالىققا بەينەۇندەۋ جولدادى، دەپ حابارلايدى «ادىرنا» ءتىلشىسى.
ماكروننىڭ پىكىرىنشە، نارازىلىق بىلدىرۋشىلەردىڭ تالاپتارى ەستىلۋى كەرەك.
«ولاردىڭ ءۇنىن ەشقانداي الالاۋسىز جانە قيىندىقتاردىڭ اۋقىمىن تومەندەتپەي تىڭداۋ قاجەت. ۇكىمەت بۇل باعىتتاعى جۇمىستى باستاپ كەتتى»، – دەدى فرانتسيا پرەزيدەنتى ۇندەۋىندە.
ماكرون بيلىك وكىلدەرى اشۋعا بۋلىققان ازاماتتاردى تىڭداپ، داعدارىستىڭ نەگىزگى سەبەپتەرىن جويۋى كەرەكتىگىن مالىمدەدى. سونىمەن قاتار ول زاڭ ۇستەمدىگىن ساقتاۋ ماڭىزدى ەكەنىن اتاپ ءوتتى.
ء«بىز زاڭدى تالاپتاردى زورلىق-زومبىلىقپەن شاتاستىرماۋىمىز كەرەك. سونداي-اق زورلىق-زومبىلىقتىڭ وسى تالاپتاردىڭ ەستىلۋىنە كەدەرگى كەلتىرۋىنە جول بەرمەۋىمىز قاجەت»، – دەدى ساياساتكەر.
ماكرون جۋىردا بولعان جاپپاي تارتىپسىزدىكتەرگە دە توقتالدى. ونىڭ ايتۋىنشا، وتكەن سەنبىدە قىلمىسكەرلەر قوسىلعان «اسا سولشىل توپتاردىڭ» ەكسترەميستەرى باقىلاۋدان شىققان زورلىق-زومبىلىق ارەكەتتەرىنە بارعان.
پرەزيدەنتتىڭ سوزىنشە، ولاردىڭ ارەكەتى سالدارىنان كاسىپورىندار تونالىپ، قوعامدىق عيماراتتارعا، دۇكەندەر مەن قالالىق اكىمدىكتەرگە شابۋىل جاسالعان. پوليتسيا قىزمەتكەرلەرى دە زارداپ شەككەن.
«بىرنەشە ءجۇز پوليتسيا قىزمەتكەرى مەن جاندارم جاراقات الدى. وسى كادرلاردى كورگەندە، ءبارىمىز: “ولار نە ويلاپ ءجۇر؟ فرانتسۋزدار فرانتسياعا قالايشا وسىنداي ارەكەت جاساي الادى؟ ليموج قالاسىنداعى اكىمدىكتى نە ءۇشىن ورتەيدى، ليونداعى تۋريستىك بيۋرونى نەگە ورتەيدى، مارسەلدەگى اكىمدىككە نەگە باسىپ كىرەدى نەمەسە بوردوداعى پرەفەكت رەزيدەنتسياسىنا نەگە شابۋىل جاسايدى؟ قالايشا وسىنداي شەكتەن شىعادى؟” دەپ ويلادىق. مۇنىڭ ەشبىرىن اقتاۋعا، تۇسىندىرۋگە نەمەسە كەشىرۋگە بولمايدى»، – دەدى ماكرون.
ول تارتىپسىزدىكتەردەن زارداپ شەككەن دۇكەن يەلەرىنە دە ارنايى ءۇن قاتتى.
«كەيبىرى ءوز دۇكەندەرى مەن سورەلەرىن قىلمىسكەرلەردەن وزدەرى قورعاۋعا ءماجبۇر بولدى. مەن ولاردىڭ مۇنداي قيىندىقپەن جالعىز قالمايتىنىنا سەندىرگىم كەلەدى»، – دەپ ۋادە بەردى پرەزيدەنت.
سونىمەن قاتار ماكرون كوشەگە شىققانداردىڭ اراسىندا زاڭدى تالاپتارىن بىلدىرگەن جۇزدەگەن مىڭ فرانتسۋز ازاماتى بولعانىن مويىندادى.
ەسكە سالايىق، قىركۇيەك ايىنىڭ سوڭىندا فرانتسيادا جوعارى سىنىپ وقۋشىلارىنىڭ نارازىلىقتارى باستالعان ەدى. ونىڭ الدىندا پاريجدە وقۋشىلاردىڭ ءىرى دەمونستراتسياسى قارساڭىندا ستيحيالىق نارازىلىق اكتسيالارى ءوتىپ، ولاردىڭ ءبىرى پوليتسيامەن قاقتىعىسقا ۇلاسىپ، كوزدەن جاس اعىزاتىن گاز قولدانىلعان.
بۇعان دەيىن فرانتسيا پرەزيدەنتى ەممانۋەل ماكرون ەلدە جالعاسىپ جاتقان نارازىلىقتارعا بايلانىستى مالىمدەمە جاساپ، قۇقىق قورعاۋ ورگاندارى قىزمەتكەرلەرىن قولدايتىنىن بىلدىرگەن بولاتىن.
ال فرانتسياداعى «ەكولوگتار» پارتياسىنان پرەزيدەنتتىككە ۇمىتكەر مارين توندەلە ىشكى ىستەر ءمينيسترى لوران نۋنەستى وتستاۆكاعا كەتۋگە شاقىرعان.
نارازىلىقتارعا اقش پرەزيدەنتى دونالد ترامپ تا پىكىر بىلدىرگەن. ول فرانتسيا بيلىگىن شەكارالاردى جابۋعا شاقىرىپ، ەلدەگى جاعدايعا زاڭسىز ميگرانتتاردى كىنالاعان ەدى.
