Fransiia prezidentı Emmanuel Makron elde jappai narazylyqtar bolyp jatqan tūsta halyqqa beineündeu joldady, dep habarlaidy «Adyrna» tılşısı.
Makronnyŋ pıkırınşe, narazylyq bıldıruşılerdıŋ talaptary estıluı kerek.
«Olardyŋ ünın eşqandai alalausyz jäne qiyndyqtardyŋ auqymyn tömendetpei tyŋdau qajet. Ükımet būl baǧyttaǧy jūmysty bastap kettı», – dedı Fransiia prezidentı ündeuınde.
Makron bilık ökılderı aşuǧa bulyqqan azamattardy tyŋdap, daǧdarystyŋ negızgı sebepterın joiuy kerektıgın mälımdedı. Sonymen qatar ol zaŋ üstemdıgın saqtau maŋyzdy ekenın atap öttı.
«Bız zaŋdy talaptardy zorlyq-zombylyqpen şatastyrmauymyz kerek. Sondai-aq zorlyq-zombylyqtyŋ osy talaptardyŋ estıluıne kedergı keltıruıne jol bermeuımız qajet», – dedı saiasatker.
Makron juyrda bolǧan jappai tärtıpsızdıkterge de toqtaldy. Onyŋ aituynşa, ötken senbıde qylmyskerler qosylǧan «asa solşyl toptardyŋ» ekstremisterı baqylaudan şyqqan zorlyq-zombylyq äreketterıne barǧan.
Prezidenttıŋ sözınşe, olardyŋ äreketı saldarynan käsıporyndar tonalyp, qoǧamdyq ǧimarattarǧa, dükender men qalalyq äkımdıkterge şabuyl jasalǧan. Polisiia qyzmetkerlerı de zardap şekken.
«Bırneşe jüz polisiia qyzmetkerı men jandarm jaraqat aldy. Osy kadrlardy körgende, bärımız: “Olar ne oilap jür? Fransuzdar Fransiiaǧa qalaişa osyndai äreket jasai alady? Limoj qalasyndaǧy äkımdıktı ne üşın örteidı, Liondaǧy turistık biurony nege örteidı, Marseldegı äkımdıkke nege basyp kıredı nemese Bordodaǧy prefekt rezidensiiasyna nege şabuyl jasaidy? Qalaişa osyndai şekten şyǧady?” dep oiladyq. Mūnyŋ eşbırın aqtauǧa, tüsındıruge nemese keşıruge bolmaidy», – dedı Makron.
Ol tärtıpsızdıkterden zardap şekken düken ielerıne de arnaiy ün qatty.
«Keibırı öz dükenderı men sörelerın qylmyskerlerden özderı qorǧauǧa mäjbür boldy. Men olardyŋ mūndai qiyndyqpen jalǧyz qalmaitynyna sendırgım keledı», – dep uäde berdı prezident.
Sonymen qatar Makron köşege şyqqandardyŋ arasynda zaŋdy talaptaryn bıldırgen jüzdegen myŋ fransuz azamaty bolǧanyn moiyndady.
Eske salaiyq, qyrküiek aiynyŋ soŋynda Fransiiada joǧary synyp oquşylarynyŋ narazylyqtary bastalǧan edı. Onyŋ aldynda Parijde oquşylardyŋ ırı demonstrasiiasy qarsaŋynda stihiialyq narazylyq aksiialary ötıp, olardyŋ bırı polisiiamen qaqtyǧysqa ūlasyp, közden jas aǧyzatyn gaz qoldanylǧan.
Būǧan deiın Fransiia prezidentı Emmanuel Makron elde jalǧasyp jatqan narazylyqtarǧa bailanysty mälımdeme jasap, qūqyq qorǧau organdary qyzmetkerlerın qoldaitynyn bıldırgen bolatyn.
Al Fransiiadaǧy «Ekologtar» partiiasynan prezidenttıkke ümıtker Marin Tondele Işkı ıster ministrı Loran Nunestı otstavkaǧa ketuge şaqyrǧan.
Narazylyqtarǧa AQŞ prezidentı Donald Tramp ta pıkır bıldırgen. Ol Fransiia bilıgın şekaralardy jabuǧa şaqyryp, eldegı jaǧdaiǧa zaŋsyz migranttardy kınälaǧan edı.
