فوتو: Instagram
رەسەيدىڭ الماتىداعى باس كونسۋلدىعى رەسەيلىك رەپەر ناۆاي باكيروۆتىڭ (Navai) قاماۋعا الىنۋىنا بايلانىستى قازاقستاننىڭ سىرتقى ىستەر مينيسترلىگىنە نوتا جولدادى. Report اگەنتتىگىنىڭ رەسەيلىك باق-قا سىلتەمە جاساپ حابارلاۋىنشا، بۇل تۋرالى رەسەي كونسۋلدىعىنىڭ ءباسپاسوز قىزمەتىنىڭ وكىلى مالىمدەگەن، دەپ حابارلايدى “ادىرنا”.
ء«بىز رەسەي ازاماتىنا قاتىستى جاعداي بويىنشا رەسمي تۇسىنىكتەمە بەرۋىن سۇراپ، قازاقستان ءسىم-ىنە نوتا جولدادىق. باس كونسۋلدىق وقيعانىڭ دامۋىن باقىلاپ وتىر»، – دەدى ول.
قازاقستاننىڭ سىرتقى ىستەر مينيسترلىگى رەسەي تاراپىنىڭ رەپەر Navai-ءدىڭ قاماۋعا الىنۋىنا بايلانىستى جولداعان نوتاسىنا بايلانىستى تۇسىنىكتەمە بەردى.
ۆەدومستۆونىڭ حابارلاۋىنشا، بۇل – كونسۋلدىق قىزمەت اياسىنداعى ستاندارتتى تاجىريبە. ءسىم ءتيىستى سۇراۋدى ەلىمىزدىڭ قۇقىق قورعاۋ ورگاندارىنا جولدايتىنىن مالىمدەدى.
ناۆاي باكيروۆ 13 قازاندا قىرعىزستاننان قازاقستانعا كىرەبەرىستەگى «قورداي» شەكارا بەكەتىندە ۇستالعان. پوليتسيا مالىمەتىنشە، ءارتىس وتىرعان كولىكتى تەكسەرۋ كەزىندە ەسىرتكى زاتى تابىلعان.
سوت ونى قاماۋدا ۇستاۋ تۇرىندەگى بۇلتارتپاۋ شاراسىن تاڭدادى. قازىرگى ۋاقىتتا ءىس بويىنشا سوتقا دەيىنگى تەرگەۋ جۇرگىزىلىپ جاتىر.
ءانشىنىڭ ادۆوكاتى رەنا كەريموۆانىڭ ايتۋىنشا، باكيروۆ ەكى اي مەرزىمگە قاماۋعا الىنعان.
