Foto: Aqorda
Bügın, 16 qazanda Erevanda prezident Qasym-Jomart Toqaev COP17 aiasyndaǧy Bioaluantürlılık boiynşa köşbasşylar sammitınde tabiǧatty saqtau üşın halyqaralyq küş-jıgerdı üilestıru qajet ekenın aitty. Būl turaly Aqorda jazdy, dep habarlaidy "Adyrna".
Memleket basşysy sammitke qatysuşylarǧa ıltipat bıldırıp, qonaqjailyǧy jäne jiyndy joǧary deŋgeide ūiymdastyrǧany üşın Armeniia Premer-ministrı Nikol Paşinianǧa alǧys aitty.
Prezident tabiǧatty qorǧau – bolaşaq ūrpaq aldyndaǧy ortaq jauapkerşılık ekenın atap öttı.
"Bız tabiǧat tartuyn bolaşaqqa jetkızudı közdeitın halyqaralyq yntymaqtastyqty keŋeitu maqsatynda jinalyp otyrmyz. Iаǧni kürdelı syn-qaterlermen betpe-bet keluı yqtimal öskeleŋ ūrpaq aldyndaǧy ortaq jauapkerşılık jönınde söz qozǧadyq. Būl – bızdıŋ örkenietımızdıŋ aman qaluyna da qatysty mäsele", – dedı Qasym-Jomart Toqaev.
Onyŋ aituynşa, bioaluantürlılık adamdardyŋ igılıgı, ekonomikalyq ornyqtylyq pen ūzaqmerzımdı qauıpsızdık üşın asa maŋyzdy. Al bülınbegen ekojüieler azyq-tülık öndırısınde, su resurstaryn qorǧauda jäne milliondaǧan adamdy kırıs közımen qamtuda maŋyzdy röl atqarady.
Memleket basşysy şöleittenu, su tapşylyǧy jäne basqa da ekologiialyq problemalar tabiǧat pen adam arasyndaǧy tepe-teŋdıkke qauıp töndırıp otyrǧanyna nazar audardy.
"Sudyŋ jetkılıksızdıgı men jerdıŋ tozuy milliondaǧan adam üşın üirenşıktı jaǧdaiǧa ainaldy. Mūnyŋ saldary tym auyr. Sebebı būl üderıster memleketter aumaǧynan ary asyp, ornyqty damudy tejeidı ärı jahandyq tūraqtylyqqa zardabyn tigızedı", – dedı Prezident.
Qasym-Jomart Toqaev ekologiialyq mäselelerdı şeşude naqty nätijege baǧyttalǧan halyqaralyq serıktestık qajet ekenın aitty.
"Mūqiiat oilastyrylǧan jäne naqty şaralardy qamtityn ekologiialyq kün tärtıbı saiasi qaişylyqtardy eŋseruı qajet. Bızge şynaiy serıktestıkke, bölıp-jarmauǧa negızdelgen, eŋ bastysy, naqty nätijelerge qol jetkızudı közdeitın halyqaralyq yntymaqtastyq kerek", – dedı Memleket basşysy.
