ورمۇز بۇعازىندا كونتەينەرلىك كەمە سۋعا باتىپ كەتتى، دەپ حابارلايدى «ادىرنا» ءتىلشىسى DW-گە سىلتەمە جاساپ.
يران يسلام رەۆوليۋتسياسى ساقشىلار كورپۋسى (يرسك) 14 قازاندا جۇك كەمەسى مينا جارىلىسىنان كەيىن ورتەنىپ، سۋعا كەتكەنىن ايتتى. ال ۇلىبريتانيانىڭ Vanguard كومپانياسى سەيسەنبى كۇنى جاسالعان شابۋىلدان كەيىن كونتەينەرلىك كەمەنىڭ سۋعا باتقانىن مالىمدەدى. ازىرگە ەكى حابارلامادا ءبىر كەمە تۋرالى ايتىلىپ وتىرعانى بەلگىسىز.
يرسك مالىمەتىنشە، 2500-دەن استام كونتەينەر تاسىمالداعان كەمە بۇعازدان رۇقسات ەتىلمەگەن ءارى قاۋىپتى باعىتپەن وتۋگە تىرىسقان. سول كەزدە ميناعا سوعىلعان. كورپۋس جاريالاعان بەينەجازبادا كەمەنىڭ ۇستىنەن كوتەرىلگەن قارا ءتۇتىن مەن سۋدا قالقىپ جۇرگەن كوپتەگەن كونتەينەر كورىنەدى. وقيعانىڭ ناقتى قاشان بولعانى حابارلانبادى.
ءتورت كەمەگە شابۋىل جاسالعان
ۇلىبريتانيانىڭ تەڭىز ساۋدا وپەراتسيالارى باسقارماسى (UKMTO) 13 قازان كۇنى كەشكە تانكەر مەن كونتەينەرلىك كەمەگە شابۋىل جاسالعانىن حابارلاعان. ال 14 قازاندا مەكەمە سەيسەنبى كۇنى بولعان تاعى ەكى شابۋىل تۋرالى مالىمەت تاراتتى. بەلگىسىز جەردەن اتىلعان سناريادتار ەكى كونتەينەرلىك كەمەگە ازداپ زاقىم كەلتىرگەن. سوعان قاراماستان، ەكى كەمە دە قوزعالىسىن جالعاستىرعان. بۇل ەكى وقيعادان زارداپ شەككەندەر تۋرالى اقپارات تۇسپەگەن.
Vanguard كومپانياسىنىڭ دەرەگىنشە، بارلىعى ءتورت كەمەگە شابۋىل جاسالعان. سينگاپۋر تۋىمەن جۇزگەن GFS Pride كونتەينەرلىك كەمەسى سنارياد تيگەننەن كەيىن سۋعا باتقان. تەڭىز قاۋىپسىزدىگى سالاسىنداعى دەرەككوزدەردىڭ مالىمەتىنشە، كەمە 2824 ستاندارتتى كونتەينەرگە (TEU) ارنالعان. پاكىستاننىڭ تەڭىز بيلىگى سۋعا باتقان كەمەدەن قالعان كونتەينەرلەردىڭ سۋدا قالقىپ جۇرگەنى تۋرالى ەسكەرتۋ جاسادى.
Alfonso تانكەرىنىڭ قازىرگى ورنالاسقان جەرى بەلگىسىز. ال GFS Giselle جانە Al Saadiyat كەمەلەرى قوزعالىسىن جالعاستىرعان.
بۇۇ-نىڭ حالىقارالىق تەڭىز ۇيىمىنىڭ (IMO) مالىمەتىنشە، GFS Pride — 28 اقپاندا اقش پەن ءيزرايلدىڭ يرانعا قارسى سوعىسى باستالعالى بەرى وسى ايماقتا سۋعا باتقان ەكىنشى ساۋدا كەمەسى.
سونداي-اق 14 قازاندا Vanguard كومپانياسى انتيگۋا مەن باربۋدا تۋىمەن جۇزگەن Cape Dao جۇك كەمەسىنىڭ دە سۋعا باتقانىن حابارلادى. كومپانيانىڭ مالىمەتىنشە، قۇتقارۋ وپەراتسياسى ءساتسىز اياقتالعاننان كەيىن كەمە سۋ استىنا كەتكەن. وعان 23 قىركۇيەكتە سنارياد تيگەن بولاتىن.
يران ۇكىمەتىنە جاقىن دەرەككوزدەردىڭ مالىمەتىنشە، تەگەران قازىر ايماقتاعى كەمەلەرگە شابۋىل جاساۋ تاكتيكاسىن وزگەرتىپ جاتىر. وسى ارقىلى يران اقش پرەزيدەنتى دونالد ترامپقا قىسىم كورسەتىپ، مۇناي باعاسىنىڭ جوعارى دەڭگەيدە ساقتالۋىنا ىقپال ەتۋدى كوزدەيدى.
ستراتەگيالىق باعىتقا باقىلاۋ ورناتۋ
اقپان ايىنىڭ سوڭىندا اقش پەن ءيزرايلدىڭ يرانعا قارسى سوعىسى باستالعالى بەرى تەگەران ستراتەگيالىق ءارى ەكونوميكالىق ماڭىزى زور ورمۇز بۇعازىن باقىلاۋىندا ۇستاپ وتىرعانىن مالىمدەپ كەلەدى. يران تاراپىنىڭ ايتۋىنشا، رۇقساتسىز وتۋگە تىرىسقان كەمەلەرگە جۇيەلى تۇردە شابۋىل جاسالادى. بۇعان جاۋاپ رەتىندە اقش يران پورتتارىنا تەڭىز بلوكاداسىن ەنگىزدى.
سوعىس باستالعانعا دەيىن الەمدىك مۇناي مەن سۇيىتىلعان تابيعي گاز تاسىمالىنىڭ شامامەن بەستەن ءبىر بولىگى ورمۇز بۇعازى ارقىلى وتەتىن.
