Ormūz būǧazynda konteinerlık keme suǧa batyp kettı, dep habarlaidy «Adyrna» tılşısı DW-ge sılteme jasap.
İran İslam revoliusiiasy saqşylar korpusy (İRSK) 14 qazanda jük kemesı mina jarylysynan keiın örtenıp, suǧa ketkenın aitty. Al Ūlybritaniianyŋ Vanguard kompaniiasy seisenbı künı jasalǧan şabuyldan keiın konteinerlık kemenıŋ suǧa batqanyn mälımdedı. Äzırge ekı habarlamada bır keme turaly aitylyp otyrǧany belgısız.
İRSK mälımetınşe, 2500-den astam konteiner tasymaldaǧan keme būǧazdan rūqsat etılmegen ärı qauıptı baǧytpen ötuge tyrysqan. Sol kezde minaǧa soǧylǧan. Korpus jariialaǧan beinejazbada kemenıŋ üstınen köterılgen qara tütın men suda qalqyp jürgen köptegen konteiner körınedı. Oqiǧanyŋ naqty qaşan bolǧany habarlanbady.
Tört kemege şabuyl jasalǧan
Ūlybritaniianyŋ Teŋız sauda operasiialary basqarmasy (UKMTO) 13 qazan künı keşke tanker men konteinerlık kemege şabuyl jasalǧanyn habarlaǧan. Al 14 qazanda mekeme seisenbı künı bolǧan taǧy ekı şabuyl turaly mälımet taratty. Belgısız jerden atylǧan snariadtar ekı konteinerlık kemege azdap zaqym keltırgen. Soǧan qaramastan, ekı keme de qozǧalysyn jalǧastyrǧan. Būl ekı oqiǧadan zardap şekkender turaly aqparat tüspegen.
Vanguard kompaniiasynyŋ deregınşe, barlyǧy tört kemege şabuyl jasalǧan. Singapur tuymen jüzgen GFS Pride konteinerlık kemesı snariad tigennen keiın suǧa batqan. Teŋız qauıpsızdıgı salasyndaǧy derekközderdıŋ mälımetınşe, keme 2824 standartty konteinerge (TEU) arnalǧan. Päkıstannyŋ teŋız bilıgı suǧa batqan kemeden qalǧan konteinerlerdıŋ suda qalqyp jürgenı turaly eskertu jasady.
Alfonso tankerınıŋ qazırgı ornalasqan jerı belgısız. Al GFS Giselle jäne Al Saadiyat kemelerı qozǧalysyn jalǧastyrǧan.
BŪŪ-nyŋ Halyqaralyq teŋız ūiymynyŋ (IMO) mälımetınşe, GFS Pride — 28 aqpanda AQŞ pen İzraildıŋ İranǧa qarsy soǧysy bastalǧaly berı osy aimaqta suǧa batqan ekınşı sauda kemesı.
Sondai-aq 14 qazanda Vanguard kompaniiasy Antigua men Barbuda tuymen jüzgen Cape Dao jük kemesınıŋ de suǧa batqanyn habarlady. Kompaniianyŋ mälımetınşe, qūtqaru operasiiasy sätsız aiaqtalǧannan keiın keme su astyna ketken. Oǧan 23 qyrküiekte snariad tigen bolatyn.
İran ükımetıne jaqyn derekközderdıŋ mälımetınşe, Tegeran qazır aimaqtaǧy kemelerge şabuyl jasau taktikasyn özgertıp jatyr. Osy arqyly İran AQŞ prezidentı Donald Trampqa qysym körsetıp, mūnai baǧasynyŋ joǧary deŋgeide saqtaluyna yqpal etudı közdeidı.
Strategiialyq baǧytqa baqylau ornatu
Aqpan aiynyŋ soŋynda AQŞ pen İzraildıŋ İranǧa qarsy soǧysy bastalǧaly berı Tegeran strategiialyq ärı ekonomikalyq maŋyzy zor Ormūz būǧazyn baqylauynda ūstap otyrǧanyn mälımdep keledı. İran tarapynyŋ aituynşa, rūqsatsyz ötuge tyrysqan kemelerge jüielı türde şabuyl jasalady. Būǧan jauap retınde AQŞ İran porttaryna teŋız blokadasyn engızdı.
Soǧys bastalǧanǧa deiın älemdık mūnai men sūiytylǧan tabiǧi gaz tasymalynyŋ şamamen besten bır bölıgı Ormūz būǧazy arqyly ötetın.
