SpaceX كومپانياسىنىڭ نەگىزىن قالاۋشى يلون ماسك اقش پرەزيدەنتى دونالد ترامپتىڭ «ۋكرايناعا جاڭا پرەزيدەنت سايلايتىن ۋاقىت كەلدى» دەگەن مالىمدەمەسىن قولدادى، دەپ حابارلايدى «ادىرنا» ءتىلشىسى.
«زەلەنسكي شەكتەن شىعىپ كەتتى»، – دەپ جازدى امەريكالىق ميللياردەر X الەۋمەتتىك جەلىسىندە.
10 قازاندا ترامپ اق ۇيدە جۋرناليستەرمەن اڭگىمەلەسۋ بارىسىندا ۋكرايناعا «كەلىسىم جاساي الاتىن جاڭا كوشباسشى قاجەت» ەكەنىن ايتقان ەدى. ونىڭ سوزىنشە، ۋكراينا باسشىسى بۇعان دەيىن دە كوپتەگەن كەلىسىمگە قول جەتكىزە الار ەدى، بىراق قانداي دا ءبىر سەبەپتەرمەن مۇنى ەشقاشان ىستەمەيدى. سونداي-اق ول ۋكراينانىڭ رەسەيدىڭ ەنەرگەتيكالىق ينفراقۇرىلىمىنا جاساعان شابۋىلدارىن سىنعا العان بولاتىن.
ترامپتىڭ پىكىرىنشە، مۇناي وڭدەۋ زاۋىتتارىنا جاسالعان سوققىلار الەمدىك وتىن تاپشىلىعىن ۋشىقتىرىپ، امەريكالىق فەرمەرلەر مەن مال شارۋاشىلىعىمەن اينالىساتىن كاسىپكەرلەرگە كەرى اسەر ەتۋى مۇمكىن.
بۇدان بولەك، ماسك ترامپتىڭ ۋكرايناعا جاڭا كوشباسشى قاجەت ەكەنى ايتىلعان پىكىرىن كەلتىرگەن ماقالاعا دا پىكىر قالدىردى.
«كەلىسەمىن، ۋكرايناعا جاڭا كوشباسشى تاباتىن ۋاقىت كەلدى»، – دەپ جازدى ول.
قازان ايىنىڭ باسىندا اقش قورعانىس ءمينيسترى پيت حەگسەت ماسكتىڭ اق ۇيگە كەڭەسشى رەتىندە ورالاتىنىن مالىمدەگەن ەدى. ونىڭ ايتۋىنشا، ماسك پەرسپەكتيۆالى قارۋ-جاراق پەن جۇيەلەردى ازىرلەۋ جانە ەنگىزۋ جۇمىستارىن قاداعالايدى.
ترامپ پەن ماسكتىڭ زەلەنسكيدى سىناۋى 9 قازاندا ترامپتىڭ رەسەي پرەزيدەنتى ۆلاديمير پۋتينمەن «وتە ءساتتى» اڭگىمە وتكىزگەنىن حابارلاۋىنان كەيىن كۇشەيگەن. ترامپتىڭ مالىمەتىنشە، تاراپتار رەسەي ديزەل وتىنىن الەمدىك نارىققا جەتكىزۋ جونىندە ۋاعدالاسقان.
