پرەزيدەنت قاسىم-جومارت توقاەۆ تۇركىمەنستاننىڭ اۆازا ۇلتتىق تۋريستىك ايماعىندا وتەتىن تمد مەملەكەتتەرى باسشىلارى كەڭەسىنىڭ وتىرىسىنا قاتىسادى. بۇل تۋرالى تمد اتقارۋشى كوميتەتى جازدى، دەپ حابارلايدى «ادىرنا» ءتىلشىسى.
جيىنعا تۇركىمەنستان پرەزيدەنتى سەردار بەردىمۇحامەدوۆ توراعالىق ەتەدى. وعان سونداي-اق ازەربايجان، ارمەنيا، بەلارۋس، قىرعىزستان، رەسەي، تاجىكستان جانە وزبەكستان كوشباسشىلارى قاتىسادى.
بۇعان دەيىن يران سىرتقى ىستەر مينيسترلىگىنىڭ رەسمي وكىلى يسمايل باعايدىڭ مالىمدەۋىنشە، وتىرىسقا يران پرەزيدەنتى ماسۋد پەزەشكيان دا قاتىسۋدى جوسپارلاپ وتىر.
مەملەكەت باسشىلارى ساياسي، ەكونوميكالىق جانە گۋمانيتارلىق سالالارداعى ىنتىماقتاستىق ماسەلەلەرىن تالقىلاپ، دوستاستىقتىڭ بيىلعى قىزمەتىنىڭ قورىتىندىلارىن شىعارادى جانە الداعى مىندەتتەردى ايقىندايدى.
تۇركىمەنستاننىڭ تمد-عا توراعالىعى اياسىندا 7–9 قازان ارالىعىندا اۆازادا بىرقاتار حالىقارالىق ءىس-شارا وتەدى.
7 قازاندا تمد سىرتقى ىستەر مينيسترلەرى كەڭەسىنىڭ وتىرىسى، ورتالىق ازيا ەلدەرىنىڭ ءامۋداريا مەن سىرداريا باسسەيندەرىنىڭ سۋ رەسۋرستارىن ءتيىمدى پايدالانۋ ماسەلەلەرىنە ارنالعان كەزدەسۋى، كاسپي تەڭىزى ماسەلەلەرى جونىندەگى جوعارى دەڭگەيلى جۇمىس توبىنىڭ جيىنى، سونداي-اق دەنساۋلىق ساقتاۋ، دەموگرافيا، تۇقىم شارۋاشىلىعى جانە تەلەراديو حابارلارىن تاراتۋ سالالارىنا قاتىستى ءىس-شارالار ۇيىمداستىرىلادى.
8 قازاندا ورتالىق ازيا مەملەكەتتەرى مەن ازەربايجان باسشىلارىنىڭ كونسۋلتاتيۆتىك كەزدەسۋى وتەدى. سول كۇنى تمد ەلدەرى مەن يراننىڭ ۇلتتىق تاعامدار فەستيۆالى جانە مادەنيەت پەن ونەر شەبەرلەرىنىڭ كونتسەرتى جوسپارلانعان.
9 قازاندا تمد مەملەكەتتەرى باسشىلارى كەڭەسىنىڭ وتىرىسىمەن قاتار كاسپي ەكولوگيالىق ءسامميتى جانە تمد ەلدەرى مەن يراننىڭ كورمەسى وتەدى.
