يزرايل پرەمەر-ءمينيسترى بينيامين نەتانياحۋ دۋبايدان تەل-اۆيۆكە باعىت العان Flydubai اۋە كومپانياسىنىڭ رەيسىندە بولعان وقيعادان كەيىن يزرايلگە شەتەلدىك ازاماتتىق اۋە تاسىمالدارىنا قاتىستى قاۋىپسىزدىك شارالارىن جان-جاقتى تەكسەرۋدى تاپسىردى. بۇل تۋرالى Fox News جازدى، دەپ حابارلايدى «ادىرنا» ءتىلشىسى.
«پرەمەر-مينيستر بينيامين نەتانياحۋ ۇلتتىق قاۋىپسىزدىك كەڭەسىنىڭ ديرەكتورى شمۋەل بەن-ەزراعا يزرايلگە شەتەلدىك ازاماتتىق اۋە تاسىمالدارىنا قاتىستى قاۋىپسىزدىكتىڭ بارلىق اسپەكتىسىنە كەشەندى تەكسەرۋ جۇرگىزۋ ءۇشىن ساراپشى تاعايىنداۋدى تاپسىردى»، – دەلىنگەن حابارلامادا.
ال Haaretz باسىلىمى سوڭعى جىلدارى ءيزرايلدىڭ قاۋىپسىزدىك قۇرىلىمدارى كولىك مينيسترلىگىنە شەتەلدىك اۋە كومپانيالارى ەكيپاجدارىن باقىلاۋ جانە جولاۋشىلاردىڭ جەكە باسىن تەكسەرۋ جۇيەسىندەگى وسال تۇستار تۋرالى بىرنەشە رەت ەسكەرتۋ جاساعانىن جازدى.
باسىلىمنىڭ مالىمەتىنشە، ءيزرايلدىڭ جالپى قاۋىپسىزدىك قىزمەتى — «شين بەت» بۇعان دەيىن شەتەلدىك اۋە كومپانيالارى مەن ولاردىڭ ەكيپاجدارىنا باقىلاۋ جۇرگىزۋ مىندەتىن ازاماتتىق اۆياتسيا باسقارماسىنا بەرۋدى ۇسىنعان. الايدا كولىك مينيسترلىگى بۇل ۇسىنىسقا قارسى شىعىپ، باقىلاۋ تەتىگىن ءوز قاراماعىندا قالدىرعان.
12-ارنانىڭ حابارلاۋىنشا، كولىك ءمينيسترى ميري رەگەۆ سوڭعى ايلاردا جاسالعان وسىنداي ءۇش ەسكەرتۋدى ەلەمەگەن. تەلەارنا مالىمەتىنشە، ەسكەرتۋلەر رەگەۆتىڭ وزىنە، كولىك مينيسترلىگىنە جانە ۇلتتىق قاۋىپسىزدىك كەڭەسىنە جولدانعانىمەن، ەشقانداي شارا قابىلدانباعان.
سارسەنبى كۇنى دۋبايدان تەل-اۆيۆكە باعىت العان Flydubai اۋە كومپانياسىنىڭ ۇشاعى توتەنشە جاعداي تۋرالى بەلگى بەرىپ، ءبىراز ۋاقىتتان كەيىن ساۋد ارابياسىنا شۇعىل قونعان ەدى. كەيىن اۋە كومپانياسى ۇشۋ كەزىندە ەكى ۇشقىشتىڭ اراسىندا توبەلەس بولعانىن راستادى.
