فوتو: apnews.com
تەننەسسي گۋبەرناتورى بيلل لي شتاتتىڭ تۇرمە جۇيەسىنىڭ باسشىسى فرەنك سترادا كريستا پايكتى ءولىم جازاسىنا كەسۋ ارەكەتى ءساتسىز اياقتالعاننان كەيىن وتستاۆكاعا كەتەتىنىن مالىمدەدى. بۇل تۋرالى NBC News جاريالادى، دەپ حابارلايدى “ادىرنا”.
تۇزەۋ دەپارتامەنتىنىڭ كوميسسارى وسى ايدا قىزمەتىنەن كەتەدى.
سترادانىڭ مالىمدەمەسىندە ونىڭ قىزمەتتەن كەتۋى تەننەسسي شتاتىنىڭ مۇددەسىنە ساي كەلەتىنى ايتىلعان. قازىر پايكقا ءولىم جازاسىن ورىنداۋ نە سەبەپتى ءساتسىز بولعانىن انىقتاۋ ءۇشىن تاۋەلسىز تەرگەۋ جۇرگىزىلىپ جاتىر.
پايكتىڭ ادۆوكاتتارى ونىڭ جاعدايىنا بايلانىستى سترادانىڭ وتستاۆكاعا كەتۋىن ورىندى شەشىم دەپ اتاعانىمەن، بۇل قازىر ولاردىڭ قورعاۋىنداعى ايەلگە كومەكتەسپەيتىنىن مالىمدەدى.
«سارسەنبى كۇنى ونىمەن بولعان جاعداي ءبىر ادامنىڭ جاۋاپكەرشىلىگىنەن الدەقايدا اۋقىمدى جۇيەلىك اقاۋدى كورسەتەدى. گۋبەرناتوردىڭ ءولىم جازاسىن ورىنداۋ جۇيەسىنە تولىق ءارى تاۋەلسىز تەرگەۋ جۇرگىزۋ تۋرالى تالابىنان تەننەسسي شتاتىنداعى ءولىم جازاسى جۇيەسىندەگى ەلەۋلى ماسەلەلەر انىقتالادى دەپ ۇمىتتەنەمىز»، – دەدى ادۆوكاتتار.
جۇما كۇنى پايكتىڭ ادۆوكاتتارى سوتقا بەرگەن قۇجاتتا ونىڭ اۋرۋحانادا وكپەنى جاساندى جەلدەتۋ اپپاراتىنا قوسىلعانىن جانە ءالى ەس-ءتۇسسىز جاتقانىن حابارلادى. بەيسەنبى كۇنى دارىگەرلەر ونىڭ اعزاسىنان شتات سوتتالعانداردى ءولىم جازاسىنا كەسۋ كەزىندە قولداناتىن پرەپاراتتىڭ ەكى دوزاسىن شىعارۋعا تىرىسقان.
ادۆوكاتتاردىڭ پىكىرىنشە، كوكتامىرىشىلىك كاتەتەرلەرگە بايلانىستى ماسەلە پەنتوباربيتالدىڭ قان تامىرىنا ەمەس، اينالاسىنداعى تىندەرگە تۇسۋىنە سەبەپ بولعان.
ء«ولىم جازاسىن ورىنداعان توپ مۇشەلەرىنىڭ ەشقايسىسى كوكتامىرىشىلىك كاتەتەرلەردىڭ دۇرىس ورناتىلماعانىن نەمەسە تامىرلاردىڭ زاقىمدانعانىن بايقاماعان سياقتى»، – دەپ جازىلعان سوت قۇجاتىندا.
ەسكە سالساق، كريستا پايك 18 جاسىندا سىنىپتاسى كوللين سلەممەردى ولتىرگەنى ءۇشىن ءولىم جازاسىنا كەسىلگەن. تەرگەۋ مالىمەتتەرىنە سايكەس، پايك قىلمىستى ءوزىنىڭ جىگىتىمەن بىرگە جاساعان.
پايك كەيىن تەننەسسي شتاتىندا ءولىم جازاسىنا كەسىلگەن ەڭ جاس ايەلدەردىڭ بىرىنە اينالدى.
ونىڭ ءولىم جازاسىن ورىنداۋ ارەكەتى ءساتسىز اياقتالعاننان كەيىن شتات بيلىگى وقيعانىڭ بارلىق ءمان-جايىن انىقتاۋ ءۇشىن تاۋەلسىز تەرگەۋ باستادى.
