مەملەكەت باسشىسى قاسىم-جومارت توقاەۆ قورعانىس مينيسترلىگىنىڭ ءۇش جوعارى لاۋازىمدى اسكەري شەنەۋنىكتى قىزمەتىنەن بوساتۋ تۋرالى وكىمدەرگە قول قويدى، دەپ حابارلايدى "ادىرنا" ۇلتتىق پورتالى.
بۇل تۋرالى اقوردا حابارلادى.
وكىمگە سايكەس:
گەنەرال-لەيتەنانت قانىش ابۋباكىروۆ قورعانىس ءمينيسترىنىڭ ءبىرىنشى ورىنباسارى – قازاقستان قارۋلى كۇشتەرى باس شتابىنىڭ باستىعى قىزمەتىنەن بوساتىلدى. ول بۇل قىزمەتكە 2026 جىلعى 17 قاڭتاردا پرەزيدەنت وكىمىمەن تاعايىندالعان ەدى.
گەنەرال-مايور الماز جۇماكەەۆ قورعانىس ءمينيسترىنىڭ ورىنباسارى قىزمەتىنەن 3 قازان كۇنى بوساتىلدى. بۇعان دەيىن 2022 جىلعى ناۋرىزدان باستاپ قارۋلى كۇشتەردىڭ دەسانتتىق-شابۋىلداۋ اسكەرلەرىن باسقاردى. 2026 جىلعى 11 ناۋرىزدا پرەزيدەنت وكىمىمەن قورعانىس ءمينيسترىنىڭ تىل جانە اسكەري ينفراقۇرىلىم جونىندەگى ورىنباسارى بولىپ تاعايىندالعان ەدى.
ءۇشىنشى اسكەري قىزمەتشى قانات نيازبەكوۆ تە قازاقستان قارۋلى كۇشتەرى اسكەري-تەڭىز كۇشتەرىنىڭ باس قولباسشىسى قىزمەتىنەن بوساتىلدى.
1 رانگالى كاپيتان قانات نيازبەكوۆ اتالمىش قىزمەتكە 2025 جىلعى 15 تامىزدا پرەزيدەنت وكىمىمەن كىرىسكەن.
ايتا كەتەيىك، 24 قىركۇيەكتە ماڭعىستاۋ وبلىسىندا اسكەري-تەڭىز كۇشتەرىنىڭ وقۋ-جاتتىعۋى كەزىندە 17 اسكەري قىزمەتشىنى كاسپي تەڭىزىنە تولقىن الىپ كەتكەن. ۇشەۋى قۇتقارىلىپ، 14 اسكەري قىزمەتشى قازا تاپتى.
وقيعاعا بايلانىستى قىلمىستىق ءىس قوزعالىپ، بەس اسكەري قىزمەتشى كۇدىكتى دەپ تانىلدى. قايعىلى جاعدايدىڭ سەبەپتەرىن انىقتاۋ ءۇشىن ۇكىمەتتىك كوميسسيا قۇرىلدى.
پرەزيدەنت قاسىم-جومارت توقاەۆ قايعىلى جاعدايدان سوڭ قورعانىس مينيسترلىگىندەگى ىستەردىڭ جاي-كۇيىنە كەشەندى تەكسەرۋ جۇرگىزۋ جونىندەگى ارنايى كوميسسيا قۇرۋعا تاپسىرما بەرگەن. كوميسسيا العاشقى اپتادان-اق مەملەكەت باسشىسىنا تەكسەرىس ناتيجەسى بويىنشا ەسەپ بەرۋى ءتيىس.
