«استانا» وڭىرلىك قولباسشىلىعىنا قاراستى «سپاسسك» وقۋ ورتالىعىنىڭ پوليگونىندا «ايبالتا-2026» جەدەل-تاكتيكالىق كوماندالىق-شتابتىق وقۋ-جاتتىعۋى باستالدى. بۇل تۋرالى 16 قىركۇيەكتە قورعانىس مينيسترلىگى جازدى، دەپ حابارلايدى «ادىرنا» ءتىلشىسى.
وقۋ-جاتتىعۋعا «استانا» وڭىرلىك قولباسشىلىعىنىڭ قۇرامالارى مەن اسكەري بولىمدەرى قاتىسىپ جاتىر. وعان 600-گە جۋىق اسكەري قىزمەتكەر جانە 50-دەن استام قارۋ-جاراق پەن اسكەري تەحنيكا جۇمىلدىرىلعان.
«نەگىزگى مىندەت – اسكەرلەردىڭ ماقساتقا ساي مىندەتتەردى ورىنداۋعا ازىرلىگىن تەكسەرۋ، كومانديرلەر مەن شتابتاردىڭ جوسپارلاۋ جانە شەشىم قابىلداۋ داعدىلارىن جەتىلدىرۋ، سونداي-اق بولىمشەلەردىڭ ءوزارا ءىس-قيمىلىن ارتتىرۋ»،– دەلىنگەن حابارلامادا.
وقۋ-جاتتىعۋ بارىسىندا شتابتار اسكەرلەردى باسقارۋ، بولىمشەلەردى جىلجىتۋ جانە قايتا توپتاستىرۋ، ءوزارا ءىس-قيمىلدى ۇيىمداستىرۋ، سونداي-اق جاعدايدىڭ وزگەرۋى بارىسىندا باسقارۋدىڭ تۇراقتىلىعىن قامتاماسىز ەتۋ ماسەلەلەرىن پىسىقتايدى.
پراكتيكالىق كەزەڭدە اسكەري قىزمەتشىلەر پوليگوندا قارۋ-جاراق پەن اسكەري تەحنيكانى قولدانا وتىرىپ، قازىرگى زامانعى قارۋلى كۇرەستىڭ دامۋ ۇردىستەرىن ەسكەرە وتىرىپ، وقۋ-جاۋىنگەرلىك مىندەتتەر كەشەنىن ورىندايدى.
«ايبالتا-2026» – رەسپۋبليكا اۋماعىندا وتكىزىلىپ جاتقان ستراتەگيالىق كوماندالىق-شتابتىق وقۋ-جاتتىعۋدىڭ كەزەڭدەرىنىڭ ءبىرى. ونىڭ بارىسىندا اسكەري قىزمەتشىلەردىڭ كاسىبي دايارلىق دەڭگەيىن، باسقارۋ ورگاندارىنىڭ ۇيلەسىمدىلىگىن جانە اسكەرلەردىڭ شىنايى جاعدايعا بارىنشا جاقىن ورتادا ءتيىمدى ارەكەت ەتۋ قابىلەتىن تەكسەرەمىز، – دەدى قارۋلى كۇشتەر قۇرلىق اسكەرلەرى باس جەدەل باسقارماسىنىڭ باستىعى پولكوۆنيك قانات جانكەەۆ.
وقۋ-جاتتىعۋ قورىتىندىسى بويىنشا باسقارۋ ورگاندارى مەن اسكەرلەردىڭ ازىرلىگى باعالانىپ، جاۋىنگەرلىك دايارلىقتى جەتىلدىرۋدىڭ ودان ارعى باعىتتارى ايقىندالادى.
