1 ناۋرىز كۇنى گەرمانيا استاناسى بەرليندە رەسەيلىك وپپوزيتسيا وكىلدەرى ۇيىمداستىرعان "رەسەي پۋتينگە قارسى" اتتى نارازىلىق اكتسياسى ءوتتى. شاراعا يۋليا ناۆالنايا، يليا ياشين جانە ۆلاديمير كارا-مۋرزا جەتەكشىلىك ەتتى، دەپ حابارلايدى "ادىرنا" ۇلتتىق پورتالى.
DW مالىمەتىنشە، پوتسدامەر پلاتس الاڭىندا وتكەن ميتينگىگە بىرنەشە جۇزدەگەن ادام جينالدى.
بۇل شەرۋ رەسەيدەگى ءۇش ماڭىزدى وقيعانىڭ جىلدىعىنا وراي ۇيىمداستىرىلدى. ەڭ اۋەلى، الەكسەي ناۆالنىيدىڭ قازاسىنا ءبىر جىل، ەكىنشىسى، رەسەيدىڭ ۋكرايناعا باسىپ كىرۋىنە ءۇش جىل، ودان سوڭ بوريس نەمتسوۆتىڭ ولتىرىلگەنىنە ون جىل بولۋىنا وراي وتكەن.
وپپوزيتسيا وكىلدەرى ۋكرايناداعى سوعىستى توقتاتۋ قاجەتتىگىن باسا ايتتى.
ميتينگ بارىسىندا ءسوز سويلەگەن يليا ياشين ۋكرايناداعى سوعىستىڭ ساياساتكەرلەر ءۇشىن مامىلەگە اينالعانىن سىنعا الدى.
"بىزگە بۇل سوعىس سيرەك مەتالدار مەن كەلىسىمدەرگە قاتىستى ساۋداعا اينالىپ كەتكەندەي كورىنەدى. بىراق بۇل – ادام تاعدىرى، بۇل – ۇلتتىق تراگەديا. سوعىس – ساۋدا ەمەس، ونى توقتاتۋ كەرەك!" – دەدى ول.
"مەموريال" قۇقىق قورعاۋ ۇيىمىنىڭ وكىلدەرى "ساياسي تۇتقىندارعا بوستاندىق!" دەگەن ۇران كوتەردى. كەيبىر شەرۋشىلەر رەسەيدىڭ ءۇش ءتۇستى جالاۋىن الىپ، "رەسەي – بۇل ءبىز!" دەپ ۇرانداتتى.
بەرليندەگى بۇل اكتسيا پۋتين رەجيمىنە قارسىلىق بىلدىرەتىن رەسەي ازاماتتارىنىڭ كەزەكتى حالىقارالىق شەرۋى بولدى.
