قازاقستاننىڭ سىرتقى ىستەر مينيسترلىگى ءۇندىستاندا تەرگەۋگە الىنعان قازاقستان ازاماتىنا كونسۋلدىق-قۇقىقتىق كومەك كورسەتىپ جاتىر. بۇل تۋرالى ۆەدومستۆونىڭ ءباسپاسوز قىزمەتى مالىمدەدى، دەپ حابارلايدى "ادىرنا".
مينيسترلىكتىڭ حابارلاۋىنشا، قازاقستاندىق ديپلوماتتار ازاماتتىڭ جاقىندارىمەن بايلانىستا. ماسەلە ءسىم-ءنىڭ باقىلاۋىندا.
بۇعان دەيىن ۇندىستاندىق Times of India باسىلىمى قازاقستان ازاماتى، 34 جاستاعى ۆەلوسپورت جاتتىقتىرۋشىسى ماقسات ايازباەۆقا قاتىستى قىلمىستىق ءىس قوزعالعانىن جازعان ەدى. باسىلىمنىڭ مالىمەتىنشە، وعان ۇندىستانداعى كامەلەتكە تولماعانداردى جىنىستىق قىلمىستاردان قورعاۋ تۋرالى POCSO زاڭى اياسىندا ايىپ تاعىلعان.
وقيعا پاتيالا قالاسىنداعى ۇلتتىق وزىق تاجىريبە ورتالىعىندا بولعانى حابارلاندى. ءۇندىستان پوليتسياسى قازاقستاندىق ماماندى ىزدەستىرۋ جۇمىستارىن جۇرگىزىپ جاتىر. پوليتسيانىڭ مالىمەتىنشە، ارىز تۇسكەننەن كەيىن ونىڭ ورنالاسقان جەرى انىقتالماعان. قۇقىق قورعاۋ ورگاندارى ونىڭ پاسپورتىن تاركىلەپ، ىزدەستىرۋ ءۇشىن ەكى جەدەل توپ قۇرعان.
قازاقستاننىڭ ۆەلوسپورت فەدەراتسياسى ماقسات ايازباەۆتىڭ سوڭعى جىلدارى قازاقستاننان تىس جەردە، ۇندىستاندىق تاراپپەن جاسالعان كەلىسىمشارت نەگىزىندە ەڭبەك ەتكەنىن راستادى. ول ءۇندىستاننىڭ ۇلتتىق ۆەلوسپورت قۇراماسىن دايىنداۋمەن اينالىسقان. فەدەراتسيا ماماننىڭ قازىرگى ۋاقىتتا قازاقستان ۇلتتىق قۇراماسىنا قاتىسى جوق ەكەنىن اتاپ ءوتتى.
ۇيىمنىڭ مالىمەتىنشە، ءۇندىستاننىڭ قۇقىق قورعاۋ ورگاندارى اتالعان جاعداي بويىنشا تەرگەۋ جۇرگىزىپ جاتىر. ال ءۇندىستاننىڭ ۆەلوسپورت فەدەراتسياسى تەرگەۋ اياقتالعانعا دەيىن ايازباەۆتىڭ قىزمەتىن ۋاقىتشا توقتاتقان.
قازاقستاندىق فەدەراتسيا ءىستىڭ بارلىق ءمان-جايى انىقتالعانشا قانداي دا ءبىر تۇپكىلىكتى قورىتىندى جاساۋعا اسىقپاۋعا شاقىردى. ۇيىم كىنالىلىك تەك زاڭدا بەلگىلەنگەن تارتىپپەن انىقتالاتىنىن اتاپ ءوتتى.
