ءۇندىستاننىڭ سولتۇستىك-شىعىسىنداعى سيككيم شتاتىندا سالىنىپ جاتقان سۋ ەلەكتر ستانتسياسىندا بولعان جارىلىس سالدارىنان توعىز ادام قازا تاپتى، دەپ حابارلايدى "ادىرنا" ۇلتتىق پورتالى Reuters-كە سىلتەپ.
ودان بولەك، تاعى 15 جۇمىسشى ءىز-ءتۇزسىز جوعالدى.
باق مالىمەتىنشە، سيككيم شتاتىندا 20 شىلدەگە قاراعان ءتۇنى بولعان. جارىلىس ۇلتتىق گيدروەلەكترلىك ەنەرگەتيكالىق كورپوراتسياسىنا تيەسىلى نىساندا بولعان.
الدىن الا اقپارات بويىنشا، اپات كەزىندە گيدرونىساننىڭ ADIT-3 توننەلىندە بارلىعى 25 جۇمىسشى، ونىڭ ىشىندە ينجەنەرلىك-تەحنيكالىق قىزمەتكەرلەر بولعان. كەيىن قۇتقارۋشىلار توعىز ادامنىڭ ءمايىتىن تاپقانىن مالىمدەدى. قالعان 15 جۇمىسشىنى ىزدەستىرۋ-قۇتقارۋ جۇمىستارى جالعاسىپ جاتىر.
قۇتقارۋ قىزمەتىنىڭ ايتۋىنشا، الدىن الا بولجام بويىنشا اپاتقا تابيعي گازدىڭ جارىلۋى سەبەپ بولۋى مۇمكىن. الايدا جارىلىستىڭ ناقتى سەبەبى تەرگەۋ اياقتالعاننان كەيىن بەلگىلى بولادى. وقيعا ورنىندا قۇتقارۋ وپەراتسياسى جۇرگىزىلىپ جاتىر. ىزدەستىرۋ جۇمىستارىنا قۇتقارۋشىلار مەن ارنايى جاساقتاردىڭ ەكى باتالونى جۇمىلدىرىلعان.
