بۇگىن الماتىدا پرەزيدەنتتىڭ جالپىۇلتتىق «تازا قازاقستان» باستاماسى اياسىندا قالدىقتاردى جيناۋ، سۇرىپتاۋ جانە كەيىن قايتا وڭدەۋگە جىبەرۋگە باعىتتالعان جاستار ەكولوگيالىق اكتسياسى ءوتىپ جاتىر.
پلاستيك، قاعاز، اليۋميني جانە قايتا وڭدەۋگە جارامدى باسقا دا ماتەريالدار سۇرىپتالىپ، ەكىنشى رەت وڭدەۋگە جىبەرىلەدى. وسىلايشا، اكتسيا كۇندەلىكتى قوقىس جاشىگىنە تاستالاتىن قالدىقتاردىڭ ەداۋىر بولىگىن قايتا پايدالانۋعا بولاتىنىن ءىس جۇزىندە كورسەتۋگە باعىتتالعان.
پرەزيدەنت قاسىم-جومارت توقاەۆ «تازا قازاقستان» جەكەلەگەن سەنبىلىكتەرمەن عانا شەكتەلمەي، ازاماتتاردىڭ كۇندەلىكتى مادەنيەتىنىڭ ءبىر بولىگىنە اينالۋى ءتيىس ەكەنىن بىرنەشە رەت اتاپ وتكەن. بۇگىندە «تازا قازاقستان» تازالىققا، تارتىپكە، قورشاعان ورتاعا ۇقىپتى قاراۋعا جانە ءار ادامنىڭ جەكە جاۋاپكەرشىلىگىنە نەگىزدەلگەن جالپىۇلتتىق جاسامپازدىق ۇلگىسى رەتىندە قاراستىرىلادى. 
الماتىدا بۇل باعىتتاعى جۇمىس جۇيەلى تۇردە جۇرگىزىلۋدە. قالا اكىمى دارحان ساتىبالدىنىڭ تاپسىرماسى بويىنشا اۋماقتاردى سانيتارلىق تازارتۋمەن قاتار، تۇرعىنداردىڭ ەكولوگيالىق ساۋاتتىلىعىن ارتتىرۋعا جانە تازالىق مادەنيەتىن قالىپتاستىرۋعا ەرەكشە كوڭىل بولىنۋدە. قالا اكىمى بۇعان دەيىن ەكولوگيالىق ءىس-شارالار فورمالدى سيپاتتا قالماي، قالالىق ورتاداعى ناقتى وزگەرىستەرگە ىقپال ەتۋى ءتيىس ەكەنىن اتاپ وتكەن.
2026 جىلدىڭ باسىنان بەرى «تازا قازاقستان» اياسىندا الماتى قالاسى جاستار ساياساتى باسقارماسىنىڭ قولداۋىمەن 98-دەن استام ەكولوگيالىق ءىس-شارا وتكىزىلىپ، وعان 18 مىڭنان استام جاس قاتىستى. سونىمەن قاتار 3,6 مىڭنان استام جاس الماتىلىق اۋقىمدى قالالىق سەنبىلىكتەرگە اتسالىستى. جۇزەگە اسىرىلعان جوبالاردىڭ قاتارىندا Plastic Hunt, Plastic-FREE Week, «قاعاز Boom»، EcoQuest Almaty, Eco Vibe, «وزىڭنەن باستا» چەللەندجى، ەكولوگيالىق رەيدتەر مەن اعارتۋشىلىق جوبالار بار. 
«بۇگىندە جاي عانا “جينالىپ، تازالاپ كەتتىك” دەگەن تاسىلدەن ارىلىپ، جينالعان قالدىقتاردىڭ ءارى قاراي نە بولاتىنىن ءتۇسىنۋ ماڭىزدى. جاستار بۇكىل ۇدەرىستى كورۋى كەرەك: قالدىقتاردى جيناۋ، دۇرىس سۇرىپتاۋ، قايتا وڭدەۋگە تاپسىرۋ جانە سول ارقىلى پوليگوندارعا تۇسەتىن قوقىس كولەمىن ازايتۋ. ءدال وسىنداي ءتاسىل ەكولوگيالىق مادەنيەتتى قالىپتاستىرادى. الماتى اكىمىنىڭ تاپسىرماسى بويىنشا ءبىز جاستارعا ءبىر رەتتىك اكتسيالارعا قاتىسىپ قانا قويماي، ەكولوگيالىق ادەتتەردى كۇندەلىكتى ومىرىنە ەنگىزۋگە مۇمكىندىك بەرەتىن جوبالاردى كوبەيتۋگە تىرىسامىز. «تازا قازاقستاننىڭ» نەگىزگى ءمانىنىڭ ءبىرى دە وسىندا — وزگەرىس ارقايسىمىزدىڭ ناقتى ارەكەتىمىزدەن باستالادى»، — دەدى مەدەۋ اۋدانى جاستار كوميۋنيتي-ورتالىعىنىڭ ستەيكحولدەرى رۋستام قايريەۆ.
بۇگىندە الماتىدا جاستار قايتالاما شيكىزات تاپسىرىپ، ەكولوگيالىق جوبالارعا قاتىسا الاتىن ءۇش ەكو-حاب جۇمىس ىستەيدى. ەكولوگيالىق باستامالارعا مىڭنان استام ۆولونتەر تارتىلعان. ال «ەكو-رەيندجەرلەر» جوباسى اياسىندا 1,5 مىڭنان استام جاس ەكولوگيالىق رەيدتەرگە، اۋماقتاردى باقىلاۋعا، قالدىقتاردى سۇرىپتاۋعا جانە اعارتۋشىلىق جۇمىستارعا قاتىسىپ ءجۇر. قالدىقتاردى بولەك جيناۋ جانە قايتا وڭدەۋ «جەتىسۋ-2» جاستار كوميۋنيتي-ورتالىعىندا اشىلعان جاڭا ەكو-حاب جۇمىسىنىڭ دا نەگىزگى باعىتتارىنىڭ بىرىنە اينالدى.
ۇيىمداستىرۋشىلاردىڭ ايتۋىنشا، بۇگىنگى اكتسيا «تازا قازاقستان» قاعيداتتارىن كۇندەلىكتى ومىردە جۇزەگە اسىرۋدىڭ تاعى ءبىر ناقتى ۇلگىسى بولماق. ماقسات — قوقىستى جاي عانا جيناپ قويۋ ەمەس، ونىڭ كولەمىن ازايتىپ، قايتا وڭدەۋگە جارامدى ماتەريالداردى قايتا اينالىمعا ەنگىزۋ.
