بۇگىن، 28 قىركۇيەك كۇنى مەملەكەت باسشىسى قاسىم-جومارت توقاەۆ ەلەنا رىباكينانى اقش اشىق چەمپيوناتىنداعى جارقىن جەڭىسىمەن جانە تەننيستەن "الەمنىڭ ءبىرىنشى راكەتكاسى" مارتەبەسىنە يە بولۋىمەن قۇتتىقتادى.بۇل تۋرالى اقوردا جازدى، دەپ حابارلايدى “ادىرنا”.
پرەزيدەنت تاريحي ءمانى زور وسىناۋ تابىس وتاندىق سپورتتىڭ دامۋىنا ولشەۋسىز ۇلەس قوسقانىن اتاپ ءوتتى.
ء"سىزدىڭ جەڭىستەرىڭىزدەن كەيىن بالالاردىڭ تەننيسكە قىزىعۋشىلىعى ارتىپ، سەكتسيالارعا كوپتەپ جازىلادى. ولار دا چەمپيون بولعىسى كەلەدى. جاس ورەندەرگە ونەگە كورسەتىپ وتىرسىز. بۇل – وتە وڭ ءۇردىس. وسكەلەڭ ۇرپاقتى سپورتقا باۋلۋ كەرەك، ويتكەنى بۇل ولاردىڭ كەلەشەگى ءۇشىن وتە ماڭىزدى. ءۇش بىردەي ۇلكەن دۋلىعا تۋرنيرىندەگى جەڭىسىڭىز تەننيس جىلناماسىنا وشپەستەي بولىپ جازىلدى. مۇنىمەن توقتاماي، الدا ءالى تالاي اسۋدى باعىندىراسىز دەپ سەنەمىن", – دەدى مەملەكەت باسشىسى.
پرەزيدەنت ەلەنا رىباكينانىڭ ادامي قاسيەتتەرىنە ايرىقشا توقتالدى.
ء"سىز كورتتا دا، جۇرتشىلىق ورتاسىندا دا بايىپتىلىعىڭىزدى بايقاتاسىز. ىشكى مادەنيەتىڭىز جوعارى ەكەنىن ۇنەمى ايتىپ جۇرەمىن. قازاقستاندى سپورتقا، اسىرەسە، تەننيسكە قولداۋ كورسەتەتىن وركەنيەتتى ءارى دامىعان مەملەكەت رەتىندە تانىتۋ تۇرعىسىنان مۇنىڭ ماڭىزى وتە زور", – دەدى قاسىم-جومارت توقاەۆ.
ەلەنا رىباكينا مەملەكەت باسشىسىنا ءوزىن ۇدايى قولداعانى، سونداي-اق قازاقستاندا ۇلكەن تەننيستىڭ دامۋىنا ايرىقشا قامقورلىق كورسەتكەنى ءۇشىن شىنايى ريزاشىلىعىن ءبىلدىردى. الەمنىڭ ءبىرىنشى راكەتكاسى قازاقستان اتىنان ونەر كورسەتۋدى ماقتان تۇتاتىنىن مالىمدەدى.
سونداي-اق، قاسىم-جومارت توقاەۆ سپورتتاعى ەرەن جەتىستىكتەرى جانە قازاقستاندا تەننيستىڭ دامۋى مەن ناسيحاتتالۋىنا قوسقان ۇلكەن ۇلەسى ءۇشىن ەلەنا رىباكينانى III دارەجەلى «بارىس» وردەنىمەن ماراپاتتادى.
