Сеул Киевті Солтүстік Кореяның екі әскери тұтқынының Оңтүстік Кореяға тапсырылғаны туралы ақпаратты жария етті және бұл қадамның құпия сақталуы жөніндегі келісім болғанын кейін жоққа шығарды деп айыптап отыр. Осыған байланысты Оңтүстік Корея президенті әкімшілігі Украинадан ресми түсініктеме мен кешірім сұрауды талап етті, деп хабарлайды «Адырна» тілшісі.
«Президент әкімшілігі Украинаның ақпаратты біржақты түрде жариялауына және кейін құпиялылық туралы келісім болмағаны жөнінде жалған мәлімдеме жасауына байланысты терең өкініш білдіреді», – делінген президенттің қоғаммен байланыс жөніндегі аға хатшысы Сон Ги Хонның жексенбі күні жарияланған мәлімдемесінде.
Ол қажет болған жағдайда үкіметтің осы жағдайға байланысты қосымша шаралар қабылдау мүмкіндігін қарастырып жатқанын айтты.
Сон Ги Хонның сөзінше, Киев тұтқындарды беру мәселесін Сеулмен бірнеше арна арқылы бірнеше рет талқылап, бұл ақпараттың құпия сақталуын талап еткен. Украина тарапы мұны солтүстіккореялық сарбаздарды украиналық әскери тұтқындарға айырбастау мүмкіндігін жіберіп алғаны үшін ел ішінде сын тууы ықтимал екенімен түсіндірген.
Оңтүстік Корея қауіпсіздік, дипломатиялық және гуманитарлық себептерді, соның ішінде тұтқындар мен олардың отбасыларының қауіпсіздігін ескере отырып, бұл ақпаратты құпия сақтауға келіскен.
Мәлімдемеге сәйкес, Украина президенті Владимир Зеленский БҰҰ Бас Ассамблеясында сөйлеген сөзінде тұтқындардың тапсырылғаны туралы ақпаратты алдын ала жеткілікті деңгейде келіссөз жүргізбестен жариялаған. Кейін Киев құпиялылық туралы қандай да бір келісімнің болғанын жоққа шығарған.
Сеул бұл жағдай екі ел үкіметі арасындағы сенімге елеулі нұқсан келтіріп, екіжақты қарым-қатынасқа кері әсер етуі мүмкін екенін ескерткен.
Еске салсақ, Владимир Зеленский сәрсенбі күні Нью-Йоркте өткен БҰҰ Бас Ассамблеясында Украина жуырда Курск облысында тұтқынға түскен Солтүстік Кореяның екі сарбазын Оңтүстік Кореяға тапсырғанын мәлімдеген. Бұл сарбаздардың тұтқынға түскені туралы Зеленский алғаш рет 2025 жылдың қаңтарында хабарлаған болатын.
